Қулупнайнинг янги нави Ўзбекистон Республикаси Қишлоқ хўжалиги вазирлиги қошидаги Сабзавот, полиз экинлари ва картошкачилик илмий-тадқиқот институтида яратилди. “Тонг ифори” номли ушбу нав ички бозор ҳамда экспорт учун мўлжалланган, дея хабар бермоқда Қишлоқ хўжалигининг матбуот хизмати.

Ҳар йили 7 минг тонна қулупнай етиштирилади

Бугун республикада ушбу резаворни йил бўйи очиқ дала ҳамда иссиқхона шароитида етиштириш учун барча зарур шароитлар мавжуд. Ушбу жараён Жанубий Корея ва Хитой давлатлари билан яқин ҳамкорлик асосида амалга ошириляпти ва шу тариқа ўзаро тажриба алмашилмоқда.

Мамлакатдаги жами 690 гектар майдонда (578 гектари – аҳоли томорқа ерлари, 112 гектари – фермер хўжаликлари) ҳар йили ўртача 7 минг тоннадан зиёд қулупнай етиштирилади. Тошкент, Наманган, Фарғона, Aндижон, Самарқанд вилоятлари эса сархил қулупнайни бозорга етказиб берувчи етакчи ҳудудлар ҳисобланади.

Ўзбекистон Қишлоқ хўжалиги вазирлиги қошидаги Сабзавот, полиз экинлари ва картошкачилик илмий-тадқиқот институтида қулупнайнинг янги серҳосил навларини яратиш бўйича фаол иш олиб борилмоқда. Илгари бозорда фақат хорижий етказиб берувчилардан чет эл валютаси ҳисобига харид қилинадиган юқори ҳосилдор импорт навлари мавжуд эди. Қулупнайнинг “Тонг ифори” нави эса маҳаллий маҳсулот, яъни, мазкур илмий-тадқиқот институти олимларининг изланишлари натижасидир. Янги нав кўчатларини Сабзавот, полиз экинлари ва картошкачилик илмий-тадқиқот институтидан харид қилиш мумкин.

Янги нав ҳақида маълумот

“Тонг ифори” нави иссиқхонада етиштиришга мослаштирилган. Экиннинг ўсиш даври 193-200 кун, биринчи теримга қадар бўлган муддат мўътадил иқлим шароитида 107-115 кунни ташкил этади. Меванинг рангги оч қизил, ҳар бирининг вазни 20-25 граммгачадир. Ушбу нав таркибида қуруқ модда миқдори 10,8 фоиз (10,2-11,2), қанд 9,5 фоиз (7,2-7,8), аскорбин кислотаси 100 г маҳсулотда 66,98 (54,8-68,0) мг, нитрат миқдори 68 мг/кгни ташкил этади. Ҳосилдорлик кўрсаткичи эса 1,8-2,2 кг/м2 дан иборат.

Сообщение Ўзбекистон селекционерлари қулупнайнинг “Тонг ифори” номли янги навини яратишди (видео) появились сначала на EastFruit.

Global Plant Genetics компаниясида  резаворларнинг янги навларини ишлаб чиқиш бўйича фаолият юритаётган британиялик олимлар  келгуси йилларда фреш-бозор учун мўлжалланган малина селекциясини ривожлантиришнинг асосий йўналишларини белгилади.

Жаҳонда малина етиштириш майдони 1990 йилдан ҳозирги кунга қадар икки баробар кўпайди ва 125 минг гектар эканлиги айтилмоқда. Ушбу майдонларнинг кўп қисмида малина қайта ишлашда – консерва, ширинликлар, шарбатлар ишлаб чиқариш учун етиштирилади. Умумий экин майдонининг тахминан 30%и фреш-бозор учун резаворлар етиштириш билан банд, аммо сархил ҳолатда сотиладиган малина ҳосилининг улуши бу қийматдан юқори. Қайта ишлаш учун мўлжалланган малина плантациялари, одатда, катта майдонларни эгаллайди, аммо уларни етиштиришда кам харажат билан у қадар юқори бўлмаган таннархни таъминловчи анъанавий экстенсив технологиялардан фойдаланилади. Сархил бозор учун резавор етиштиришда эса фермерлар ҳимояланган тупроқда малина етиштиришнинг интенсив технологиясини афзал кўришади, дея хабар бермоқда FruitNews Global Plant Geneticsнинг матбуот хизмати материалларига асосланиб.

Интенсив ўсиш технологияларининг асосий элементлари ҳимоя тузилмаларидан фойдаланиш ва тувакларда малина ўстиришни ўз ичига олади. Бу усул экишдан кейин тахминан 90 кун ичида резавордан юқори ҳосил олиш имконини беради. Субстратда резавор етиштириш, айниқса, тупроқ касалликлари ҳақида гап кетганда, ўсимлик касалликларининг пайдо бўлиши ва тарқалиши хавфини сезиларли даражада камайтиради.  Биринчи йил куртаклашда мева берадиган навлардан фойдаланиш бир хил плантациядан йилига икки марта ҳосил олиш мумкинлигини англатади.  Ушбу технология учун юқори сифатли экин материали –  лонг-кейн зарур.

Сўнгги ўн йил ичида малина селекцияси сезиларли даражада ривожланди, ҳар қандай янги нав бугунги узоқ таъминот занжирининг қийинчиликларига дош бера олиши кутилмоқда.  Резавор сифати нуқтаи назаридан, малина селекциясини нималар кутмоқда? Энди истеъмолчилар чакана савдо пештахталарига доимий равишда юқори сифатли маҳсулот чиқишини кутиб, шундай маҳсулот харид қилишаётган экан, демак, селециянинг кўпроқ ўрганилиши керак бўлган йўналишларидан бири резавор таъмидир. Ёши улуғ истеъмолчилар, кўпинча, замонавий навларда етишмаётган жиҳат – мевалардаги ўткир ва нордон таъмни афзал билишади, ёшларга эса ширин мевалар маъқул.

Global Plant Genetics Жеймс Хаттон институти билан ҳамкорликда яқинда жаҳон бозорига ҳосил йиғиш жараёнини кенгайтирувчи 4 та янги юқори маҳсулдор малина навларини чиқарди: «Скай» (Skye), Льюис (Lewis), Глен Мор (Glen Mor) ва Глен Kаррон (Glen Carron) .

«Скай» нави – ремонтант бўлиб, баҳор ва кузда –  биринчи йил куртаклашда иккита мўл ҳосилни таъминлайди. Ушбу навдаги резавор йирик, транспортабеллиги юқори, мазали, рангга бойдир. Бу нав турли иқлим шароитларида етиштириш учун қўл келади, чунки, қишда узоқ вақт паст ҳароратга муҳтож эмас.

АҚШда маълуму машҳур бўлган «Льюис» ёки «Бонни Льюис» ҳам ремонтант нав, у «Скай» навини яхшигина бойитади, биринчи йил куртаклашда ҳосил йиғим-терими бошида мева беради. Мевалар жуда яхши сақланиш ва таъм хусусиятлари билан ажралиб туради. Бундай навли малина йилига икки марта ҳосил беради. Шу билан бирга, иккинчи йил куртаклашдаги резаворлар учун Брикс шкаласи бўйича шакар миқдори 14%га етиши мумкин.

«Глен Мор» иккинчи йил куртаклашда мева беради.  Қишда узоқ вақт паст ҳароратга муҳтож эмас. Бу нав мавсум охирида биринчи йил куртаклаган  новданинг учида ҳам ҳосил бериши билан ажралиб туради. «Глен Мор» малинасининг илдиз чиришига қаршилик кўрсатувчи Rub118b генетик маркери бор. Бу Global Plant Genetics селекция дастуридаги шундай мустаҳкамликка эга биринчи малина навидир.  Ушбу резавор мукаммал сифат, сақлов муддати, юқори маҳсулдорлик, таъм ва ҳажмга эга.

«Глен Каррон» нави – қишки совуқ ҳароратда узоқ вақт уйқу даврини талаб қилади.  У иккинчи йил куртаклашда ҳосил беради ва лонг-кейн ўсимликларида малина етиштириш учун мос келади. Юқори ҳосилдорлик билан ажралиб турувчи бу навнинг мевалари ёз бошида пишиб етилади.  Ушбу турдаги резаворнинг таъм сифатлари, одатда, турли хил қиёсий дегустациялар маҳали ажратилади.

«Глен Мор» ўсимликлар илдизи чиришига генетик жиҳатдан чидамли нав бўлиб, келгусида бошқа навлар селекцияси учун қўлланади. Global Plant Geneticsда яқин келажакда резавор ҳажми, сақлаш муддати, ҳосилдорлик ва таъм нуқтаи назаридан янги такомиллаштирилган навлар яратилиши кутилмоқда.

Сообщение Британиялик олимлар сархил бозор учун мўлжалланган малина селекцияси ривожининг асосий йўналишларини белгилади появились сначала на EastFruit.

Чакана савдо гиганти Каufland (Германия) кам углеводли (ўртача кўрсаткичдан 30% камроқ) картошкани сотувга чиқарди.

«Linella» номли янги нав бутун Германия бўйлаб Каuflandнинг барча савдо нуқталарида сотилмоқда, дея хабар берди Аll Retail.

Картошканинг инновацион нави Каuflandнинг узоқ йиллик ҳамкори – Europlant Plant Breeding компанияси билан ҳамкорликда яратилган.

Картошка навларига ихтисослашган селекцион компания углевод миқдори деярли учдан бир қисмга камайтирилган турли навларни ишлаб чиққан.

Картошка органик равишда, биринчи навбатда, Қуйи Саксониядаги оилавий корхоналарда етиштирилади, улар назорат қилинадиган усулларга мувофиқ ишлайди ва QS сертификатига эга.

Мунтазам тестлар картошканинг белгиланган паст энергетик таркибга мос келишини таъминлайди.

Картошка нозик таъмга ва мумсимон текстурага эга бўлиб, салатларга ёки димлаб пишириш учун жуда ҳам мос келади.

«Картошка рационимизнинг ажралмас қисмидир. Linella кам углеводли картошка истеъмол қилишни истовчи мижозлар учун мукаммал муқобил», дейди Кauflandнинг мева-сабзавотлар хариди бўйича бошқарувчи директори Стефан Люкс.

Сообщение Германияда кам углеводли картошка сотувга чиқарилди появились сначала на EastFruit.

Ошпазларни «йиғлатмайдиган» янги  Sunions навли пиёз Fruit Logistica Innovation Award мукофоти номинациясига сазовор бўлди.

ВАSF селекционерларининг фикрига кўра, янги навни яратиш учун 35 йилдан ортиқ вақт давомида тадқиқот ва ишланмалар олиб борилган ва бу бозордаги биринчи «йиғлатмайдиган» ширин пиёз нави бўлди. Ушбу нав табиий чатиштириш йўли билан ишлаб чиқилган.

BASFнинг маълум қилишича, янги нав Leatherhead Food Research компанияси ўтказган тестларда истеъмолчиларнинг кўплаб ижобий фикрларини олган.  Мутахассисларнинг фикрича, маҳсулот апрель ойида Берлинда бўлиб ўтган худди шу номдаги кўргазмада Fruit Logistica Innovation Award мукофотини қўлга киритиш учун имкониятга эга.

Шунингдек ўқинг: Тайланд мумли олмаси – мевами ёки резавор?

Янги навни яратиш ғояси 35 йилдан зиёдроқ вақт аввал BASF селекционери Рик Уотсон қиш фаслида омборда сақлаш мумкин бўлган ширин пиёз навини яратмоқчи бўлганида юзага келган. Янги нав пайдо бўлган АҚШда пиёзнинг икки мавсуми мавжуд: қишки сақлаш мавсуми (пиёз йилнинг тўққиз ойи давомида омбордан олиб чиқилади) ва ёзги уч ойлик янги узилган пиёз даври, деб ёзмоқда «АгроБизнес«.

Компания маълумотларига кўра, «кўз ёшларсиз» ширин пиёз илгари ҳеч бўлмаган ва генетик жиҳатдан уни яратиш жуда қийин эди.  BASF ҳозирга қадар биринчи бўлиб, «кўз ёшларсиз» ва ширин таъмни уйғунлаштирган ягона турдаги Sunions навли (сақлаш учун мўлжалланган) пиёзни тақдим этди. BASFнинг Сабзавот уруғлари сенсори  лабораторияси ва Огайо штати университети  ўтказган синовлардан сўнг янги нав «кўз ёш чақирмайдиган» пиёз сифатида сертификатланди.

Сообщение Селекционерлар «кўз ёшларсиз» пиёз яратиш устида 35 йилдан зиёдроқ ишлашди появились сначала на EastFruit.

Сўнгги пайтда Озарбайжон фермерлари учун юқори сифатли маҳаллий уруғлик картошка танқислиги катта муаммога айланди, деб ёзмоқда “Картофельная система” (“Картошка тизими”) Sputnik Озарбайжон ҳаволасига таяниб.  Картошка етиштирувчилар хориждан қиммат уруғлик картошка олиб киришга мажбур бўлишяпти.

Товуз тажриба станциясида маҳаллий навларни кўпайтириш ва уруғчилик ишлари олиб борилмоқда.  Мутахассисларнинг таъкидлашича, маҳаллий уруғлки картошка  хориждан келтирилган картошкадан арзон ва унумдорроқдир. Аран пасттекислиги далаларида яхши парвариш билан ҳар гектардан 25-30 тоннагача картошка ҳосилини олиш мумкин.

«Айни пайтда Товуз тажриба станцияси далаларида “Амир-600”, “Севинж”, “Тельман” навли картошкаларнинг маҳаллий  уруғлари етиштирилмоқда.  Импорт қилинган навлардан фарқли ўлароқ, маҳаллий уруғлик картошка арзон. Лекин  миқдор етарлича эмас, аксарият фермерлар унга жуда катта эҳтиёж сезяпти», дейди Товуз тажриба станциясининг Картошка селекцияси ва уруғлик лабораторияси мудири Юсиф Мустафоев.

Мустафоевнинг сўзларига кўра, етишмовчилик сабаби –  тажриба учун экин майдонларининг озлигидир.

«Картошканинг янги навларини яратишга ҳаракат қиляпмиз.  Айни пайтга келиб, институтда бир қанча янги маҳсулотлар яратилди. Булар “Чанлибел”, “Угур”, “Вагиф” ва бошқалардир. Ушбу навлар ҳосилдор, касалликларга чидамли. Бироқ, тажриба майдонлари етарли эмас.  Мақсадимиз – яқин келажакда республикани уруғлик картошка билан таъминлаш учун уруғлик картошка миқдорини кўпайтиришдир”, дейди лаборатория мудири.

Озарбайжонда ҳозир картошка 60-70 минг гектар майдонда етиштирилмоқда ва фермер хўжаликлари 200 минг тоннадан ортиқ уруғлик картошкага эҳтиёж сезяпти.

Сообщение Озарбайжонда маҳаллий уруғлик картошка тақчиллиги кузатилмоқда появились сначала на EastFruit.

Тайланд мумли олмаси кичик ва ўртача катталикда бўлиб, узунлиги тахминан олти сантиметр, чўзинчоқ, қўнғироқча шаклидаги резавордир.

Силлиқ пўстлоғи бинафшарангдан қизил ва оч яшил ранггача, шакли эса бироз қовурғасимон, мум қатламини эслатувчи енгил жилоси бор.

Ушбу резавор ҳақида propozitsiya.com сайти specialtyproduce ҳаволасига асосланиб ёзмоқда.

Олманинг пўстлоқости қисми оқиш, намлик даражаси юқори. Меванинг марказ қисмида катта уруғ бўшлиғи мавжуд бўлиб, у йирик, тўқ-жигарранг уруғларни жамлайди.

Тайланд мумли олмаси бироз қарсилдоқ ва серсув, енгил ширали, таъми – Осиё нокининг таъмига ўхшайди. Ушбу турдаги олма баҳорда пишиб етилади.

Шунингдек ўқинг: АҚШда оқ қулупнай – Pink-А-Boo Pineberries®нинг тарғибот кампанияси бошланди

“Ботаник жиҳатдан Syzygium samarangense деб таснифланувчи Тайланд мумли олмаси 18 метргача ўсувчи йирик тропик дарахтда тўпсимон бўлиб шаклланади. Номига қарамай, у фақат пўстлоғининг рангги ва тузилишига кўра олмага ўхшайди, аслида эса резавордир. Етук дарахт ҳар бир ҳосилдан етти юз фунтгача мева бериши мумкин. Тайланд мумли олмаси, одатда, серсув егулик сифатида сархил ҳолатда истеъмол қилинади», дейди олимлар.

Тайланд мумли олмалари таркибида яллиғланишга қарши хусусиятга эга  олеанол кислотаси мавжуд.

«Ушбу резаворни, шунингдек, қовуриш, қайнатиш, соуслар учун консервалаш ёки музқаймоқ, қуймоқ ва француз тостларига солиш мумкин» дейишмоқда селекционерлар.

Сообщение Тайланд мумли олмаси – мевами ёки резавор? появились сначала на EastFruit.

Wish Farms (Флорида) –  резавор етиштирувчи халқаро компания Pink-А-Boo Pineberries® савдо белгиси остидаги қулупнай тарғиботи учун маркетинг кампанияси бошланганини эълон қилди.

Pink-А-Boo Pineberries® савдо белгисининг номланиши резаворнинг пишиб етилган пушти рангига ишора қилувчи сўз ўйинидир, чунки, қулупнай оқ рангда бўлиб, пишиб етилганида пушти тусга киради. Резавор таркибидаги шакар миқдори анъанавий навларга қараганда бироз юқори, ананас, нок ва ўрик ноталарининг нозик таъмини эслатади, деб ёзмоқда FruitNews FreshFruitPortal материалларига асосланиб.

“Ўйлайманки, янги резавор  Wish Farms ва чакана савдо ҳамкорларимиз учун энг машҳур маҳсулотлардан бирига айланади. Жамоамиз куч-қувватга тўла ва биз муваффақиятга эришиш учун бор салоҳиятимизни ишга соламиз.  Бозорда Pink-А-Boo Pineberries®ни илгари суришга хизмат қилувчи маркетинг стратегиясини ишлаб чиқдик”, дейди компания директори Гэри Вишнацки.

Pink-А-Boo Pineberries® қадоғида пишган ананас тасвирланган ва қўшимча урғу бериш учун «Ripe and Ready» ибораси қайд этилган.

Резавор Флорида университетида анъанавий селекция усулларидан фойдаланган ҳолда етиштирилган. Кўп йиллар аввал ишнинг бошида олимлар ҳаммага таниш қизил қулупнайни ёввойи оқ қулупнай билан чатиштиришган, кейин эса ҳосил бўлган шакллар билан селекция давом эттирилган. Wish Farms янги резаворлар ёрлиғига «ГМО эмас» деган ёзувни қайд этишга қарор қилди.

“Мижозлар ёрқин қизил рангли қулупнайни излашга ўрганиб қолган, шунинг учун бизнинг вазифамиз истеъмолчига янги мева ҳақида кенг маълумот беришдир. Ёрлиқдаги эслатмалар ва информацион қайдларга қўшимча равишда биз ижтимоий тармоқларда маълумот тарқатишни режалаштирмоқдамиз», дея қўшимча қилди Wish Farmsнинг маркетинг бўйича директори Эмбер Мэлоуни.

2020 йилда Wish Farms қулупнай етиштириладиган майдонни 324 гектарга оширди. Тахминан 3 гектарга оқ қулупнай (Pink-А-Boo Pineberries®) экилган. Ушбу қулупнай ҳосил йиғим-терим мавсуми декабрдан апрелгача давом этадиган Флорида штатида 40 гектардан (100 акр) ва Калифорнияда 60 гектардан (150 акр) ортиқ майдонда етиштирилмоқда. Бу ерда резавор январь ойидан июнгача, сўнг кузда йиғиб олинади.

Сообщение АҚШда оқ қулупнай – Pink-А-Boo Pineberries®нинг тарғибот кампанияси бошланди появились сначала на EastFruit.

Ширин маккажўхорининг ҳар хил турлари мавжуд ва улар ҳам таъми, ҳам ташқи кўриниши жиҳатидан фарқланади. Маҳсулотнинг товар кўриниши жуда муҳим, чунки, кўпчилик истеъмолчилар ташқи кўриниши бежирим маҳсулотларни афзал билади. Агар сариқ маккажўхори ҳар қандай қайта ишлаш жараёнида товар кўринишини сақлаб қолса, оқ маккажўхори пиширилганда ёки консерваланганда хира тортиб қолади. Украиналик селекционерлар ширин оқ маккажўхорининг «Монблан» номли янги навини яратиш орқали бу муаммони ҳал этишди, дея хабар беради  SEEDS нашри.

Янги нав Украинанинг «Мнагор» компанияси (Винница вилояти)да селекцияланган.

“Ҳозирги кунда АҚШда оқ бошоқли маккажўхори жуда машҳур. Ушбу фитнес маҳсулот парҳез учун жуда мос, чунки, унинг таркибида толалар даражаси юқори. Икки-уч йилдан сўнг Украинада ҳам мазкур турдаги маҳсулот кенг танилиши кутилмоқда. Бундай маккажўхори ҳам таом тайёрлаш, ҳам консерва учун ишлатилади. Аммо оқ донли навларнинг бир камчилиги бор – қайта ишлангач, рангги хира тортади. Аслида, бу ҳам муаммо эмас. «Мнагор» компанияси ушбу масаланинг ечимини топишга муваффақ бўлди.  Биз янги – «Монблан F1» навини яратдик. Бундай маккажўхорининг уруғи сутранг-оқ бўлиб, пишгач хира тортмайди ”, дейилади «Мнагор»нинг Facebookдаги саҳифасида.

Шуниси эътиборга лойиқки, «Монблан» бошқа оқ маккажўхори турларига нисбатан ёрқинроқ рангга эга. Шунингдек, у таркибидаги юқори шакар миқдори ва нисбатан  узунлиги билан ажралиб туради (узунлиги – 23 сантиметргача).

Шунингдек ўқинг: Вакуумланган маккажўхори сўталарини сотиш ёзда сархил маккажўхори сотишдан кўра 8-10 баравар даромадлидир

“Мнагор» компанияси беш йилдан буён ўта оқ навларни қидирмоқда. Зеро, шунда сақлаш учун муҳим саналган усул – иссиқлик билан ишлов берилганида доналар рангини йўқотмайди. Бизнинг янги «Монблан» нави айнан шундай. Ушбу нав туфайли Украина консерва саноати рақобатбардош устунликка эга бўлади ва келгуси йили оқ консерва ёки музлатилган маккажўхори бозорига кириши мумкин»,  дейди «Мнагор» раҳбари Михаил Нагорняк.

Сообщение Украина компанияси консерва саноати учун оқ маккажўхори навини етиштирди появились сначала на EastFruit.

Шимолий Каролина (АҚШ) даги Pairwise компанияси CRISPR ген-таҳрирлаш технологиясидан фойдаланиб, резаворлар истеъмолчи ва етиштирувчи учун жозибадор бўлишини таъминлаш мақсадида маймунжон ҳамда қора малина ДНКсини ўзгартиришга ҳаракат қилишмоқда.

Селекционерлар ўсимлик структурасини яхшилаш, резаворлар янада қулай бўлишини таъминлаш учун уруғларни йўқ қилиш, самарали ва хавфсиз ҳосил олиш учун буталардаги тиканларни олиб ташлашни мақсад қилишган, деб ёзмоқда «АгроБизнес«.

Маймунжон ва малинага талаб тобора ортиб бормоқда, бироқ, ушбу турдаги резаворларни кўпчилик истеъмол қилишига тўсқинлик қилувчи сабаблар мавжуд. Фермерлар учун эса маҳсулот етиштириш, жумладан, уруғлар, қисқа муддатли сақлов, маҳсулот таъми ва тузилишининг консистенцияси йўқлиги муаммодир. Баъзи ҳолларда фермерлар энг яхши таъмли резаворлардан воз кечиш эвазига ҳосилни осон йиғиб олишга муваффақ бўлишмоқда.

Pairwise компанияси 2018 йили маймунжон ва унчалик таниш бўлмаган қора малина устида иш бошлаган эди. Компаниядагиларнинг таъкидлашича, ушбу мевалар таркибида антоциан миқдори баланд ва голубикадан беш-олти баравар кўпроқ антиоксидантлар мавжуд. Қўшма Штатларга Туркиядан келтирилган қизил малинадан фарқли ўлароқ, қора мевали навлар  Шимолий Америкада бугун пайдо бўлган. Қора малинанинг уруғи кўпроқ, меваси қаттиқроқ ва бошқача таъм хусусиятига эга.

Шунингдек ўқинг: Олхўри ва ўрик дурагайлари – испан селекционерларидан янги мевалар линияси (фото)

Такомиллашган резаворларнинг чакана савдоси жорий ўн йиллик ўрталарига режалаштирилган.

Юқорида айтилганидек, Pairwise компанияси CRISPRдан фойдаланади, бу жараёнда у геномнинг кетма-кетлигини олиб ташлаши ёки ўзгартириши мумкин, шунда маълум бир хусусият пайдо бўлмайди ёки керакли хусусият янада аниқлашади. Генетик модификациядан фарқли ўлароқ, ўсимликка янги ДНК-материали қўшилганда аввалдан мавжуд хусусиятларга ўзгартириш киритилади.

Резаворлардан ташқари, компания тадқиқотнинг турли босқичларида бўлган бошқа маҳсулотлар устида ҳам ишламоқда. Ўзгартирилган япроқли кўкат 2022 йилда турли тадбирлар доирасида истеъмолчиларга таништирилади, 2023 йилда эса кенгроқ миқёсдаги савдо режалаштирилган.

Олчани данагидан халос қилиш – компаниянинг кўп йиллик ғояларидан бири – дарахт ўсиши ва мевага кириши учун вақт керак бўлгани боис, бу иш кўпроқ вақт талаб этмоқда.

Сообщение Маймунжон, малина ва олча энди уруғсиз ва данаксиз – АҚШ селекционерлари бу борада изланишмоқда появились сначала на EastFruit.

Европа компанияси Украинанинг «Мнагор» (Винница вилояти) компанияси селекциясига оид ширин маккажўхорининг икки навига буюртма берди. Энди ички бозордаги энг оммабоп навлар –  «Украинский биколор» ва «Дейнерис» Европа Иттифоқи мамлакатларида етиштирилади, деб хабар бермоқда SEEDS.

«Мнагор» – Украинада ширин маккажўхори уруғларини етиштирувчи ва сотувчи энг машҳур компаниялардан бири. Корхона қарийб йигирма йилдан буён янги навлар селекцияси билан шуғулланмоқда.

Буюртма жуда катта – тахминан 500 гектар майдонга экин экишга тўғри келади, дейилади «Мнагор»нинг Facebookдаги  саҳифасида. Бироқ, украиналик фермерлар ҳам уруғсиз қолмайди, дейди компания эгаси Михаил Нагорняк.

Танланган навларга келсак, «Дейнерис» энг эртаги суперширин гибриддир. Ушбу турдаги маккажўхори органик деҳқончилик учун ҳам жуда мос келади. «Украинский биколор» эса ташқи кўринишидан жозибали нав, чунки, унинг доналари икки хил рангда – оқ ва сариқ. Ушбу маккажўхори товар кўринишини йўқотмай, узоқ вақт сақланиши мумкин ва шакарнинг 24%дан ортиғини  жамлаган.

Шунингдек ўқинг: Вакуумланган маккажўхори сўталарини сотиш ёзда сархил маккажўхори сотишдан кўра 8-10 баравар даромадлидир

Михаил Нагорняк ҳозирча буюртмачининг исмини ошкор эта олмайди – бу шартномада қатъий белгиланган.

Аслида, корхона Европа хабига тўрт навнинг уруғлик намуналарини тақдим этди. Ҳамкасблар барча турдаги ширин маккажўхори сифатини тан олишди, аммо Европа компаниясида икки хил навнинг муқобили бор. «Украинский биколор» ва «Дейнерис» эса ажойиб сифат кўрсаткичларига эга бўлган жуда ноёб навлар бўлиб чиқди.

Михаил Нагорнякнинг сўзларига кўра, бу навлар Украинада ҳам «мегамашҳур». Европа Иттифоқига маҳсулот экспорт қилиш «Мнагор»нинг ички шартномалар бўйича мажбуриятларни бажаришига тўсқинлик қилмайди.

Сообщение Украинада етиштирилган ширин маккажўхори навлари европаликларни қизиқтириб қўйди появились сначала на EastFruit.