Сўнгги бир неча йил ичида сархил маҳсулот етиштирувчи фермерларни ташвишга солаётган асосий муаммолардан бири ишчи кучи етишмовчилигидир. Ва бу вазият яқин орада ўзгармайди, аксинча, ишчи кучи қимматлашиши, меҳнат қиладиганларни топиш қийинлашиши эҳтимоли юқоридир. Гап фақат ишчи кучи нархи ва мавжудлиги ҳақида эмас, балки ишчилар тайёрлашнинг сифати ҳақида ҳам бормоқда, зеро, ўқитиш вақти ва харажатлари тобора ортяпти.

Шу маънода сабзавотлар ҳосилини йиғиб олишда ҳам, қайта ишлашда ҳам робототехника муҳим аҳамият касб этади. Фермерлар ва маҳсулотни қайта ишловчи корхоналар дуч келадиган асосий муаммо – кадрлар масаласини ҳал этишга ёрдам берувчи янги технологиялар ишлаб чиқилмоқда. Бу ҳақида EastFruit мутахассислари FreshPlaza ҳаволасига таяниб хабар бермоқда.

Scorpion Vision 25 йилдан зиёд вақт давомида автомобилсозлик ва аэрокосмик саноат учун ишланмалар тақдим этиб келади ва яқинда у ўз эътиборини сабзавотни қайта ишлаш саноатига қаратди.

“Сархил маҳсулотлар саноатида қарийб олти йилдан буён фаолият юритмоқдамиз. Биздан Брюссель карамини буташ бўйича ечим ишлаб чиқиш сўралди. Бу бир қарашда оддий туюлса-да, турли фасллар, навлар, экин келиб чиққан мамлакат туфайли новдалар ҳар қандай шакл, ўлчам ва рангда бўлиши мумкинлигини ҳисобга олиш керак», дейди Scorpion Vision бош директори Пол Уилсон.

Шунингдек ўқинг: FarmDroid далада – келажак қишлоқ хўжалиги «ишчи»си (видео)

АI Scorpion Vision билан биргаликда 3D-намойишдан фойдаланган ҳолда компания ниҳолларнинг учини кесиш ва ташқи баргларни олиб ташлаш тизимини яратди. Тизим пояни навдан қатъи назар «танийди» ва белгиланган якуний масофадан кесади, ушбу масофани созлаш мумкин.

“Бир технология турли хил сабзавотлар, масалан, порей пиёзини кесишда ҳам қўлланиши мумкин. Пиёз ювилганидан сўнг у камера остига туширилади. Ушбу камера поя пластинаси қаерда жойлашганини жуда аниқ билади ва сув тиғи илдизларни олиб ташлаш ҳамда поя тоза, бузилмаган ҳолда қолиши учун миллиметр аниқликда кесиш учун йўналтирилади”, дейди бошқарувчи.

Технологиядан, шунингдек, салатнинг ўзагини, брюква ҳамда сабзининг пояси ва думини олиб ташлаш, илдиз шикастланишини аниқлашда фойдаланиш мумкин.

Пол Уилсоннинг сўзларига кўра, тизим инсоннинг кўриш қобилияти сингари  ишлайди, лекин унинг ҳаракати анча тез ва аниқ. Шу билан бирга, ҳар доим ҳамма нарса тўғри ишлаётганини текшириш учун ишлаб чиқариш линияларида инсон омилига эҳтиёж бор. Порей пиёзини қайта ишлаш линиясида компания ишчилар сонини 40 нафардан атиги 6 нафарга қисқартиришга муваффақ бўлди.

«Янги тизимларни жорий этишда харажат ҳар доим асосий омил бўлиб қолади, бироқ кўплаб ишлаб чиқарувчилар ишчи кучи танқислиги туфайли сармоя киритишга мажбур бўлиши мумкин. Биз икки-уч йил ичида сармоядан даромад олинишини ният қилганмиз”, дея хулоса қилди Пол Уилсон.

Сообщение Сабзавот ҳосилини йиғиш ва қайта ишлаш тезлиги ҳамда аниқлигини таъминловчи роботлаштирилган тизим (видео) появились сначала на EastFruit.

2022 йилнинг 15 февралида Кubota корпорацияси АGRITECHNICA деб номланган жаҳондаги энг йирик қишлоқ хўжалиги техникаси кўргазмасида «Аgrifuture Concept Winner – 2022» мукофотига лойиқ, деб топилди. Ғолиб – “Тevel Aerobotics Technologies” компанияси билан ҳамкорликда ишлаб чиқилган мева ҳосилини йиғишнинг автоматлаштирилган тизими нафақат новаторлик иши сифатида, балки амалиётга кенг татбиқ этиш мумкинлиги билан ҳам юқори баҳоланди. Бу хусусда EastFruit FreshPlaza ҳаволасига таяниб ёзмоқда.

Қишлоқ хўжалиги техникаси бўйича жаҳондаги энг йирик кўргазма саналадиган АGRITECHNICA доирасидаги “Аgrifuture Concept Winner – 2022″ мукофоти келгуси 5-10 йилда агросаноат секторига жорий этишнинг реал имкониятларига қаратилган инновацион ечимлар учун мукофотдир.

Кubotа ва Теvel мева фермалари фаолиятида қўлланадиган автоматлаштирилган мева йиғиш тизими учун ушбу мукофотга сазовор бўлди.  Мазкур инновацион ғоя янгилик эканлиги, амалиётга самарали татбиқ этиш мумкинлиги ва универсаллиги боис, юқори баҳога муносиб кўрилди. Зеро, бу хусусиятлари уни турли ўлчамдаги мева етиштирувчи фермер хўжаликларида кенг қўллаш имконини беради.

Янги концепция сунъий интеллект (СИ) ёрдамида пишиб етилган меваларни аниқлаш орқали терим жараёнини автоматлаштириш учун Теvel (FARTM) учувчи автоном роботи билан жиҳозланган теримчи-роботларни ўз ичига олган.  FAR Tevelнинг Кubota учувчисиз тракторлари ва бошқа қишлоқ хўжалиги техникаси билан комбинацияси алоҳида фермер хўжаликлари талабларига мос келувчи турли конфигурацияларни яратишга имкон беради ва ҳосил йиғим-теримининг белгиланган усулларига тўлиқ мослашувни таъминлайди. Ушбу концепция бутун жаҳон бўйлаб мева етиштирувчи фермер хўжаликларида кучайиб бораётган ишчи кучи танқислиги муаммосини ҳал этишга хизмат қилиши билан аҳамиятлидир. Тизимнинг, шунингдек, мева йиғиш учун идеал вақтни аниқлаш орқали маҳсулот сифатини ошириш ва ҳосил бой берилиши сабаб пайдо бўладиган чиқитларни камайтириш каби бошқа афзалликлари ҳам бор.

Kubota келажак қишлоқ хўжалигини яратиш учун инновацион технологияларни ишлаб чиқувчи компаниялар ва тадқиқот институтлари билан ҳамкорликни давом эттиради ва комплекс ечимлар компанияси сифатида ҳар бир авлод эҳтиёжларини тўлиқ  қондира олади.

Сообщение Мева ҳосилини йиғиб олишнинг автоматлаштирилган тизими концепцияси «Аgrifuture Concept Winner – 2022» мукофотини қўлга киритди появились сначала на EastFruit.

Қишлоқ хўжалигига робототехникани жорий этишда Украина ўзининг етакчилик мавқеини яна бир бор исбот этди. Тернополда Украинанинг «Роботлаштирилган агротизимлар» номли  компанияси 118 дона учувчисиз техникадан иборат Европадаги энг йирик дрон-пуркагичлар флотини тузди. Булар 59 та кўчма бригада бўлиб, 2022 йилги қишлоқ хўжалиги мавсумида 500 минг гектардан ортиқ майдондаги ҳосилга ишлов беради.

Ўтган йили барча хизмат кўрсатиш компаниялари қарийб 1 миллион гектар майдонга ишлов берганини ҳисобга олсак, эълон қилинган режалар дрон-пуркагичларнинг ўсимликларни ҳимоялаш воситалари бозоридаги ўрни ва аҳамияти салмоқли даражада ошганидан далолат беради.

Компания бутун Украина бўйлаб робототехникадан фойдаланишни кўпайтириш мақсадида. «Роботлаштирилган агротизимлар» компанияси раҳбари Игорь Чайкивскийнинг фикрича, бу ишчилар меҳнатини осонлаштириб, Украина далалари ҳосилдорлигини оширади.

Украинадаги учувчисиз ускуналарнинг асосий интегратори Drone UA XAG бренди остидаги дрон- пуркагичларни етказиб бериш бўйича кенг кўламли буюртма бажарилганини эълон қилди. 2022 йил бошида 100 донадан иборат биринчи партия мижозга жўнатилди, у кейинги бир неча ой ичида етказиб берилади. «Бу DroneUA тарихидаги энг йирик якка тартибдаги буюртмадир», дейди компания ҳаммуассиси Валерий Яковенко. «Биз ушбу компания билан  ҳамкорликни 2019 йилда 2 та дрон реализацияси орқали бошладик. Ўша пайтда Игорь Чайкивский  «Нега энди синаб кўрмаслигимиз керак?», деган қизиқиш билан дронларни сотиб олган эди. Шундан сўнг бир нечта кичик етказиб беришлар амалга оширилди. 2021 йилда «Роботлаштирилган агротизимлар» жамоаси ўз флоти ва пудратчилари билан 100 минг гектарга яқин майдонга ишлов бериш мавсумини якунлади. Йил охирида эса Игорь Чайкивский бизга 100 та дрон буюртмаси билан мурожаат қилди!  Бу – ақл бовар қилмас даражадаги буюртма эди. Айнан шу воқеанинг ўзи прогнозларимизни тасдиқлайди: дрон-пуркагичларнинг хизмат кўрсатиш бозори ҳар йили беш баробар ўсади.  Хизмат кўрсатувчи компаниялар сони нафақат Украинада ўсиб, кенгаяди, агар тўғри бошқарув йўлга қўйилса, бу – мамлакатдан ташқарида ҳам ривожланиши мумкин бўлган бизнес. Украина ҳозирданоқ, ҳаво-пуркагичларни жорий қилиш интенсивлиги бўйича Европа давлатларидан сезиларли даражада олдинда. Кўпчилик биздан ўрнак олади, бизнинг моделимизни асос деб билади! Қолаверса, 2021 йил якунларига кўра, биз XAG бренди остидаги дронларни интеграциялаш бўйича Бразилия, Вьетнам ва Тайланд каби етакчиларни ортда қолдириб, жаҳондаги  1-рақамли давлатга айландик. Жаҳон бозорини ички томондан билганимиз ҳолда айтишимиз мумкинки, Украина ҳаммадан кўра тез ҳаракатланмоқда”.

Дрон-пуркагичлар бозорининг фаол ўсиши фермерлар орасида ушбу хизмат турига талаб ортиши билан боғлиқ. Ўтган йили нархлар энг юқори даврда маҳсулот баҳоси деярли икки баробар ошди, шу билан бирга, дронлар анъанавий ускуналар билан солиштирилганда мутлақо рақобатбардошлигича қолади. Узоқ муддатли ёмғирлар, шунингдек, фермерларнинг ўзини оқловчи ускуналарни қўллаш кераклигини тушуниб етгани буюртмалар сони ошишига хизмат қилди. «Роботлаштирилган агротизимлар» компанияси бутун Украина бўйлаб робототехникадан фойдаланишни кўпайтириш  мақсади сари интилмоқда.

“Дрон-пуркагичлар билан ишлаш орқали фермерлар пестицидларнинг 30 фоизини, сувнинг 95 фоизини ва ёқилғининг 90 фоизи (ёқилғи нархи ақл бовар қилмас даражада ошиб кетиши фонида)ни тежайди! Бундай асосли ҳисоб-китобни дронлар ёрдамида ўсимликларни ҳимояловчи воситаларни таклиф этадиган хизмат кўрсатувчи компанияларнинг ҳар бири тасдиқлайди. Ўтган йили биз мижозларимизнинг катта қисмига рад жавобини беришга мажбур бўлдик, чунки, талаб техник имкониятларимиздан ошиб кетди. Бригадалар мавсум давомида жуда қизғин ишлади ва суткалаб меҳнат қилди. Шу боис ҳам, бунча кўп дронга сармоя киритиш импульсив ечим эмас. Бозор ўсиб бормоқда ва вақти-вақти билан бир неча баробар ўсишда давом этади», дейди Роботлаштирилган агротизимлар» компанияси асосчиси Игорь Чайкивский.

Инвестицияларга қайтадиган бўлсак: хизмат кўрсатиш компаниялари минтақаларда ташкил этилаётган бизнес ва у юқори мобиллик туфайли бутун Украина бўйлаб ишлаши мумкин. Компания 100 та дронга сармоя киритиб, мавсумда 50 тагача мобил бригадани иш билан таъминлаш учун 120 дан ортиқ иш ўринларини яратмоқда.

Сообщение Тернопол (Украина)да Европадаги энг йирик агродронлар флоти ташкил этилди (видео) появились сначала на EastFruit.

Голландиядаги Вагенинген университети тадқиқотчилари Нидерландия истеъмолчиларни ҳимоя қилиш ташкилоти  (NWО) тақдим этган 2,5 миллион долларлик маблағ эвазига агроозиқ-овқат секторидаги сунъий интеллект имкониятларини ўрганишади.

Улар агроозиқ-овқат секторида сунъий интеллектдан фойдаланиш методологиясини ишлаб чиқишади, мазкур методология асбоб-ускуналар, тавсиялар, этика ва ҳуқуқ меъёрлари, шунингдек, сунъий интеллектни қўллаш бўйича жалб қилиш стратегияларини ўз ичига олади, дея хабар бермоқда «АгроБизнес«.

“Ҳозир одамлар сунъий интеллект қишлоқ хўжалигига нима олиб келиши ва у қандай хавф-хатар туғдириши мумкинлиги ҳақида тасаввурга эга эмас. Агар фермер сут ишлаб чиқариш ҳақида ўзининг кундалик маълумотларини тақдим этиш орқали сунъий интеллект лойиҳасида иштирок этадиган бўлса, ўз компаниясидаги ишлаб чиқариш жараёни ҳақида рақобатчи фермерларга хабар бермаслик учун бу маълумотлардан аноним фойдаланилишини истайди”, дейди Wageningen Economic Reseachнинг  этика ва масъул тадқиқотлар ҳамда инновациялар бўйича катта илмий ходими, лойиҳа раҳбарларидан бири  Симоне ван дер Бург.

Тадқиқот этика, ҳуқуқ ва ижтимоий таъсир (ELSA) протоколларига мувофиқ, Al for Sustainable Food Systems (AI4SFS) лабораториясида ўтказилади.

Олимлар ELSA омиллари сунъий интеллект дизайнига интеграциялаштириладиган олтита амалий тадқиқотни ўтказишади.

Саволлар ҳозирча жавобсиз

Сунъий интеллект роботлари одамларнинг иш ўрнини эгаллайди ва бу агроозиқ-овқат секторидаги меҳнат бозорини тубдан ўзгартириши кутилмоқда.

Шу сабабли, олимлар «ишчи-инсонларга сунъий интеллект қандай таҳдид солиши мумкин?» ёки «роботлар сифатли ва аҳамиятли ишлар учун қандай имкониятларни таклиф қилади?», деган саволларга жавоб излашади.

Ўт ўрувчи робот тасодифан бегона ўтлар ўрнига керакли экинларни олиб ташлаши ва шу билан ҳосилни йўқ қилиши мумкин. Бу ҳолатда ким жавобгарликни бўйнига олади? Ва етказилган зарарни ким қоплаши керак? Алгоритм йирик агрокомпания учун энг яхши ечимларни топишга ўргатилади, бу эса даромад ошишига олиб келади.  Бироқ, охир-оқибат, алгоритм айбдор шахснинг мавжудлигини кўрсатувчи ҳаракатни амалга оширади.  Бу ўринда алгоритмни айблай оламизми?

Сунъий интеллектдан озиқ-овқат секторида тобора кўпроқ фойдаланилмоқда. Мисол учун, ифор ва таъм бўйича ихтисослашган Firmenichнинг формулалар генератори бозорга тез етказиб бериладиган индивидуал парфюмерия ва таъм ечимларини таъминлайди.

Symrise компанияси ўсимлик навларида таъмларни модуляция қилувчи ўсимлик ингредиентларини аниқлаш учун сунъий интеллектдан фойдаланади. Ушбу технология ёрдамида немис компанияси таъмни мувозанатлаштира оладиган янги потенциал материалларни аниқлаш учун минглаб қадимий Хитой рецептларини ўрганиб чиқди.

Сообщение Нидерландиялик олимлар агробизнесда сунъий интеллект қўлланишининг этикавий ва ҳуқуқий хатарларини ўрганишмоқда появились сначала на EastFruit.

FarmDroid жаҳондаги биринчи тўлиқ автоматик робот бўлиб, у ҳам экин экиш, ҳам бегона ўтларга қарши механик курашиш билан боғлиқ юмушларни бажаради. Робот фермерларга экин экиш ва қишлоқ хўжалиги экинларини бегона ўтлардан тозалаш харажатларини камайтиришга ёрдам беради. Ва у мазкур вазифаларни экологик жиҳатдан нейтрал, тоза усулда бажаради.

FarmDroid ApS компаниясига Йенс ва Кристиан Уорминглар Innovatoinsmiljøеt Syddansk А/S ҳамда роботлар бўйича мутахассис – Эсбен Остергаард билан ҳамкорликда асос солишган.

2020 йил баҳорида FarmDroid Европанинг кўпгина қисмида 1500 гектардан ортиқ майдонга экин экиб, далаларни бегона ўтлардан тозалади.

Келажак қишлоқ хўжалиги: у қандай ишлайди?

FarmDroid FD20 – бу қуёш батареясида ишлайдиган дала роботи бўлиб, у экин экиш маҳали ўсимликларнинг жойлашувини белгилаш учун GPS сигналидан фойдаланади, сўнгра ҳам қаторлараро, ҳам қаторларнинг ўзида бегона ўтларга қарши механик курашни амалга оширади.

Экин экишдаги ноёб аниқлик ҳосилни бегона ўтлардан тозалаш имконини бериб, бегона ўтларни қўлда тозалаш заруратини камайтиради ёки бунга умуман ҳожат қолдирмайди.

Тўртта қуёш панели аккумулятор батареялари учун энергия ишлаб чиқаради ва кунига 24 соатгача CО2 ажралиб чиқишининг ноль даражаси билан ишлашни таъминлайди. Шундай қилиб, FarmDroid FD20 га мавсум давомида далада ишлаш имконини берувчи ташқи аккумуляторни зарядлашнинг ҳожати йўқ.

FarmDroidнинг афзалликлари:

• Қанд-лавлаги, озуқ лавлагиси, пиёз ва рапс каби экинларни тўлиқ автоматик экиш, бегона ўтлардан тозалаш.
• Бегона ўтларни йўқ қилишдаги аниқлик юқори ҳосил олинишини таъминлайди, мураккаб ва такрорий қўл меҳнатига бўлган эҳтиёжни камайтиради ёки бунга умуман ҳожат қолдирмайди.
• FD20 GPS технологиясидан фойдаланади. Ушбу технология ҳар бир экилган уруғнинг жойлашган ўрнини аниқлаш учун ишлатилади, шу боис ҳам, FD20 экинлар ёки бегона ўтларни таниб олиш учун камера кучига таянмайди.
• Ўсимликлар униб чиқмасиданоқ, бегона ўтларни тозалашни бошлаш мумкин, чунки, робот экин экиш жараёнида уруғлар қаерда жойлашганини «кўради», шу боис, қаерни бегона ўтлардан тозалашни яхши билади.
• Роботнинг енгил вазни тупроқ микротузилмасини бузмайди.
• Ўзини-ўзи бошқариш ва автоматик ўрнатиш хусусияти туфайли мониторингга ҳожат йўқ.

Робот қандай ишлашини кўрмоқчи бўлсангиз – видеони томоша қилинг:

Фото ва видео манбаси: FARMDROID расмий сайти

Сообщение FarmDroid далада – келажак қишлоқ хўжалиги «ишчи»си (видео) появились сначала на EastFruit.

Япониянинг қишлоқ хўжалиги ускуналарини ишлаб чиқаришга ихтисослашган Кubota компанияси Теsla ҳаммуассиси ва муҳандиси Ян Райтни сунъий интеллект ёрдамида бошқариладиган дала роботларини яратиш учун ҳамкорликка чорлади. Дастлаб винобоп узум навларини етиштириш жараёнида ишлайдиган машиналарга эътибор қаратилади.

Nikkei Asia маълумотларига кўра, Ян Райт билан ҳамкорлик орқали Кubota АҚШнинг янги тадқиқот бўлимига сунъий интеллект ва автоматлаштириш технологиясини яхши биладиган ходимларни олиб келишга умид қилмоқда. 50-60 га яқин муҳандислар (хусусан, Кubotaдан), бўлинманинг Силикон водийси ва бошқа жойлардаги иншоотларида ишлайди. Kubota келгуси бир неча йил ичида лойиҳага ўнлаб миллион доллар ажратади, деб ёзмоқда Future Farming.

Узумзорда ишловчи роботлар

Узум етиштириш жараёнида ишловчи роботлар узумзорлар бўйлаб мустақил равишда ҳаракатланиши керак. Сунъий интеллект (СИ) камера тасвирларини таҳлил қилиш, новдаларни кесиш учун танлаш ва токлар ҳолатини текшириш учун ишлатилади. Кubota АҚШнинг Ғарбий соҳилидаги анъанавий қишлоқ хўжалиги ускуналаридан фойдаланувчи фермерлар талабини кутмоқда. Зеро, компания йиғим-терим ишларини ҳам роботлар  бажаришини режалаштирган.

Сообщение Япониянинг Кubota компанияси ва Теsla асосчиси ҳамкорлигида узум етиштирувчи робот ишлаб чиқарилади появились сначала на EastFruit.

Голландиянинг Priva компанияси ўзининг биринчи роботини тақдим этди. У иссиқхонада ишлашга мўлжалланган бўлиб, бошқа ходимлар билан бирга хавфсиз ва автоном ҳаракатлана оладиган Коmpano номли машинадир.

Коmpano – тўлиқ автоматлаштирилган аккумуляторли кесувчи-робот бўлиб, кунига 24 соатгача ишлай олади, дея хабар бермоқда EastFruit мутахассислари FreshFruitPortal ҳаволасига таяниб.

Компаниянинг мақсади –  иссиқхоналарда помидор баргларини олиб ташлаш учун мўлжалланган ушбу тўлиқ автоном робот-кесгич билан боғдорчилик соҳасида инқилобга эришишдир.

Ҳосилни қайта ишлаш иссиқхоналарнинг кундалик фаолиятида муҳим аҳамият касб этади, чунки глобал озиқ-овқат маҳсулотларига бўлган талаб тез суръатлар билан ўсишда давом этаётган бир пайтда малакали ходимлар сони тобора камайиб боряпти.

Робототехника кундалик операцияларнинг узлуксизлигини таъминлаш орқали ечим таклиф қилмоқда. Бунда харажатлар бир хил ёки ундан паст даражада сақланиб қолади.

Коmpano 5 кВт/соатлик аккумуляторга эга, оғирлиги деярли 425 килограмм, узунлиги 191 сантиметр, эни 88 сантиметр, баландлиги эса 180 сантиметр.

Унинг патентланган қўли ва интеллектуал алгоритмлари бир гектар майдонда ҳафтасига 85% самарадорликни кафолатлайди. Робот-кесгич ақлли қурилма ёрдамида осон бошқарилади ва фойдаланувчининг хоҳиш-истакларига мувофиқ созланади.

Компания маълумотларига кўра, бу фойдаланувчиларга помидор баргларини қўлда олиб ташлашнинг арзон варианти таклиф қилинаётган жаҳондаги биринчи роботдир. Унинг меҳнати ишлаб чиқарувчи учун ишчи кучини бошқаришни осонлаштиради.

Шунингдек ўқинг: Тоyota Ventures агросектор учун мўлжалланган роботларга сармоя киритади (видео)

Голландиядаги етакчи ишлаб чиқарувчилар, технологик ҳамкорлар ва экспертларнинг МТА билан ҳамкорликда ишлаб чиққан роботи сентябрь ойи охирида GreenTech тадбирида намойиш этилди ва ҳозир у бозорда сотоувга чиқаришга тайёр.

Робот Голландиядаги бир қатор иссиқхоналарда муваффақиятли синовдан ўтган. МТАда 50 та роботлар серияси ишлаб чиқарилмоқда ва уларни Priva веб-сайтида сотиб олиш мумкин. Аммо нарх ҳақида маълумот ҳозирча мавжуд эмас.

Келгусида Коmpano ассортименти бодринг баргини кесувчи ва помидор-бодринг ҳосилини йиғувчи робот билан кенгайтирилади.

Сообщение Нидерландияда помидор баргларини кесувчи робот сотувга чиқмоқда (видео) появились сначала на EastFruit.

Қишлоқ хўжалигида робототехника бўйича стартап – Тоyota Ventures компаниясининг қишлоқ хўжалигига йўналтирган биринчи сармояси бўлди.

Burro – илгари Аugen Robotics сифатида танилган автоном қишлоқ хўжалиги тармоғи ечимлари компанияси 10,9 миллион долларлик маблағ жалб қилди.

Инвестицион раундга S2G Ventures ва Тoyota Ventures лидерлик қилди, деб хабар бермоқда PrecisionAg ҳаволасига асосланиб Fruit-inform.

Burro – бу «мурватни ёқ ва ишла»  тамойили асосида ишловчи ягона робот.

Бу одамлар эмас, роботлар очиқ ҳавода ишлаши кутилаётган автоном келажакка биринчи қадамдир. Burro роботлари фермерларга даромадни ошириш ва бугунгидек ишчи кучи танқислигидан азият чекмаслик имконини беради, шунингдек, эртанги кун учун янада мураккаб автоматлаштиришга асос солинади.

Шунингдек ўқинг: Американинг Advanced Farm компанияси қулупнай ва олма йиғиб-терувчи роботлаштирилган технологияларни такомиллаштирмоқда

Нашр таъкидлаганидек, хўраки узум, резаворлар ва кўчатлар каби кўп меҳнат талаб қилувчи экинларни етиштирувчилар ҳали ҳам автоматлаштириш қийин бўлган ишларда ишчилар меҳнатидан фойдаланишмоқда. Аммо сўнгги йилларда мавжуд ишчи кучи сезиларли даражада камайган.

Инқироз шароитида ишлаб чиқарувчилар автоном тизимларни қидиришяпти, аммо бугун сотувда деярли ҳеч нарса йўқ.

Қабул қилинган маблағ билан Burro ушбу эҳтиёжни қондиришни режалаштирмоқда. Келгуси йили компания янги ва эски мижозлар учун 500 дан ортиқ робот ишлаб чиқаради.

Сообщение Тоyota Ventures агросектор учун мўлжалланган роботларга сармоя киритади (видео) появились сначала на EastFruit.

Калифорнияда жойлашган, фермерлар учун роботлаштирилган технологиялар ишлаб чиқувчи Advanced Farm Technologies, Inc. инвестицияларнинг В серияси якунланганини эълон қилди. $25 млн маблағ тўпланган ушбу босқич боғ қулупнайи йиғиб-териш технологияларини такомиллаштириш ва уни олма теришга мослаштиришда компанияни қўллаб-қувватлашга қаратилган. В сериядаги молиялаштириш раундига Catapult Ventures раҳбарлик қилди ва унга А сериядаги барча инвесторлар киритилди. Улар: Kubota Corporation, Yamaha Motor Corporation ва Impact Ventures.

“Доимий қўллаб-қувватлашга ва илк инвесторларимизнинг ушбу молиялаштириш раундида ҳам ишончига эга бўлиш ёқимли. Бу TX Strawberry Harvester комбайнини ишлаб чиқиш ва бозорга чиқариш йўлида бутун жамоамизнинг машаққатли меҳнати натижасидир, — дейди Кайл Кобб, Advanced Farm Technologies президенти ва асосчиси. – Ушбу муваффақиятимиз биз билан ишлаётган, ўз далаларида автоматлаштириш усулларини бугунданоқ жорий этишда ижодий ёндашаётган олма ва қулупнай етиштирувчи ҳамкорларимизнинг ишончини билдиради. Уларнинг фикрлари, мулоҳазалари бизга технологияни тезкорлик билан яхшилаш имконини берди”.

Қулупнай теришга мўлжалланган Advanced Farm TX роботлаштирилган комбайни қўлда терувчи бригада билан ёнма-ён ишлайди, пишиб етилган қизил меваларни автоматик равишда аниқлайди ва уларни озиқ-овқат маҳсулотларини ушлаб олишга мослаштирилган нозик технология ёрдамида теради, деб ёзади АгроБизнес. Махсус яратилган машина очиқ ҳаво ва тупроқдаги мураккаб шарт-шароитларга дош берадиган, суткасига 24 соат мобайнида далаларда юриб, мустақил равишда мева териш имконини берувчи машинани ўқитиш технологиялари ва ўта ривожланган компьютерли кўриш қобилиятига эга бўлган бир неча роботлардан иборат. Қулупнай териб олувчи ушбу ТХ роботлаштирилган комбайнлари аввалроқ бозорда муваффақият қозонган бўлиб, доимий равишда ишчи кучи етишмовчилиги муаммосига дуч келадиган қулупнай ва олма етиштирувчи корхоналар учун катта имконият эшикларини очади.

Шунингдек ўқинг: Канадада ўсимликларни иссиқхонада етиштириш учун вертикал колонналарга патент берилди

Ўзининг роботлаштирилган қулупнай терувчи ТХ комбайнлар паркини Калифорниядаги боғ қулупнайи етиштириладиган йирик марказларда ишга солиб, Advanced Farm компанияси GoodFarms, The Oppenheimer Group ва Naturipe сингари резаворлар етиштирувчи дунёнинг етакчи ишлаб чиқарувчиларига ўнлаб тонна сархил маҳсулотларни бозорга чиқаришда ёрдам берди.

Advanced Farm Technologies компанияси фермерлар учун роботлаштирилган технологияларни ишлаб чиқади. 2019 йилда Advanced Farm қаторлар орасидаги қулупнайлар учун махсус ишлаб чиқилган ўзининг Т-6 инновацион платформаси ёрдамида қулупнайни роботлаштирилган тарзда териб олиш технологиясини тижоратлаштирган Америкадаги илк компания бўлди. Мижозлар билан $70 млн доллардан зиёд суммада шартнома тузган Advanced Farm ҳамкорлик алоқалари, шу жумладан Дэвисдаги Калифорния университетининг селекция дастури билан биргаликда ишлаш орқали ўз технологияларини янада такомиллаштириш устида иш олиб бормоқда. Бунда асосий мақсад боғ қулупнайини дала шароитида териб олиш бўйича теримдан тортиб то навларга ажратиш ва қадоқлашгача бўлган жараёнларни қамраб олувчи автоматлаштирилган ечимларнинг тўлиқ босқичини яратишдир.

Сообщение Американинг Advanced Farm компанияси қулупнай ва олма йиғиб-терувчи роботлаштирилган технологияларни такомиллаштирмоқда появились сначала на EastFruit.

AҚШнинг автоном робот ишлаб чиқарувчи Cаrbon Robotics номли компанияси  сунъий интеллект ва лазер технологиясини ўзида жамлаган бегона ўтлардан тозаловчи роботнинг учинчи авлодини тақдим этди.

Aвтоном робот кучли лазер ёрдамида бегона ўтларни йўқ қилиш учун компьютерлашган кўриш қобилиятидан фойдаланади. Битта робот кунига 6,5   гектаргача бегона ўтларни йўқ қилиши мумкин ва бу қўл меҳнати билан ишловчи бир нечта бригадалар ўрнини боса олиш деганидир. Ҳар бир роботнинг оғирлиги тахминан 4,5 тонна бўлиб, ушбу кўрсаткич ўртача катталикдаги трактор ҳажмига тенг.

Роботлар металл кесувчи 150 ваттли саккизта карбонат ангидрид лазери билан қуролланган. Ушбу техника бегона ўтларни аниқлаш ва уларни фермерлар ҳимоя қилмоқчи бўлган экинлардан фарқлаш учун компьютерлашган кўриш қобилиятига таянади, деб ёзмоқда AгроБизнес.

Роботлар учун пиёдалар йўли ёки шосселардаги чизиқларни аниқлашда ҳайдовчисиз бошқариладиган автомашиналарда қўлланувчи технологияларнинг муқобили ишлатилади.

Шунингдек ўқинг: Буюк Британия фермаларида салат барги ҳосилини йиғишнинг роботлаштирилиши мавсумий ишчиларга эҳтиёжни кескин камайтиради

Cаrbon Robotics ишлаб чиқарувчилари учун энг катта тўсиқлардан бири  ёруғлик муаммоси бўлди. Чунки, компьютернинг кўриш қобилияти 24 соат давомида фермада бўлиши керак бўлган (бу қийин) барқарор ёруғлик шароитларига таянади. Бунинг учун, яъни кечаю кундуз ишлашда керакли аниқликка эга бўлиш учун тасвир сифатини таъминловчи видеокамералар билан синхронлаштириладиган кучли ёритиш тизимини жорий қилиш керак эди.

Ишлаб чиқарувчиларнинг фикрича, улар лазер усулида шундай ишлайдики, нур тупроқ ва унинг микробиологиясига умуман таъсир ўтказмайди. Тупроқ саломатлиги қишлоқ хўжалиги саноатининг асосий жиҳатларидан бири бўлгани боис, бу муаммони инновацион йўл билан ҳал қилиш долзарб саналади.

Гербицидлардан фойдаланишни йўқ қилиш қобилияти туфайли робот регенерация усулларини қўлловчи фермер хўжаликлари учун яхши номзод бўла олади. Бундан ташқари, у бегона ўтларга қарши курашиш воситалари чегараланган органик тупроқ билан ишловчилар фаолиятида ҳам қўл келади.

Carbon роботларининг бошқа афзалликлари ҳам бор: қўл меҳнатига кам боғлиқлик туфайли умумий харажатлар пастлиги, бегона ўтларнинг кам таъсири натижасида ҳосил баландлиги кабилар шулар жумласидандир.

Компания янги моделини, асосан, AҚШнинг ғарбий соҳилидаги фермерларга тўғридан-тўғри сотмоқда. Маҳсулот 2021 йил учун сотиб бўлинди, янги моделларни эса 2022 йилги вегетатация мавсуми учун олдиндан буюртма қилиш мумкин. Стартап, шунингдек, ижара вариантини ҳам таклиф қилмоқда, бу, айниқса, майдони кам фермер хўжаликларига мос келади.

Сообщение Сунъий интеллект ва лазер технологиялари: АҚШда ерни бегона ўтлардан тозаловчи роботларнинг янги авлоди яратилди появились сначала на EastFruit.