Американинг Сhampion foods компанияси Қозоғистондан сабзавот маҳсулотларини импорт қилиш, шунингдек, Қозоғистон Республикаси ҳудудида қишлоқ хўжалиги маҳсулотларини қайта ишлаш корхонасини қуришдан манфаатдор.  Компания вакиллари Қозоғистон Республикаси Қишлоқ хўжалиги вазири Ербол Карашукеев ҳамда Бош вазир ўринбосари – Савдо ва интеграция вазири Бахит Султонов билан учрашувларда ҳамкорлик режаларини муҳокама қилишди, дея хабар бермоқда ElDala.kz.

“Компания Қозоғистондан музлатилган картошка ва бошқа сабзавот маҳсулотлари экспортини ташкиллаштиришга тайёр, шунингдек, Қозоғистонда қишлоқ хўжалиги маҳсулотларини чуқур қайта ишлаш заводларини қуриш лойиҳаларига сармоя киритишдан манфаатдор. Жами сармоя 100 миллион долларга тенг”, дея хабар қилди Қозоғистон Республикаси Қишлоқ хўжалиги вазирлиги матбуот хизмати.

Шунингдек ўқинг: Қозоғистон Қишлоқ хўжалиги вазирлиги фермерларни қўллаб-қувватлаш бўйича янги чора-тадбирларни таклиф қилмоқда

Champion Foods АҚШдаги энг йирик озиқ-овқат трейдери ва айни пайтда озиқ-овқат ишлаб чиқарувчи компания ҳисобланади. 25 йилдан зиёд вақт давомида компания озиқ-овқат хизматлари, чакана савдо, саноат, нон маҳсулотларини тайёрлаш, оффшор кейтеринг компаниялари, кема чандлерлари ва круиз линиялари бўйича биринчи рақамли етказиб берувчи ҳисобланади. Компания шакар, музлатилган сабзавотлар, гуруч, дуккаклилар, маккажўхори, нонли таёқчалар, пицца ва бошқа маҳсулотларни етказиб беради.

Савдо ва интеграция вазирлигининг маълум қилишича, экспортёрларни давлат томонидан қўллаб-қувватлаш оператори – “QazTrade” АЖ Champion Foods компанияси билан ҳамкорлик меморандумини имзолади. Томонлар Қозоғистон озиқ-овқат маҳсулотларини ташқи бозорларда илгари суриш бўйича қўшма ташаббусларни қўллаб-қувватлаш ва экспортга йўналтирилган қўшма сармоявий лойиҳаларни амалга оширишни режалаштирмоқда.

Сообщение АҚШ компанияси Қозоғистон агромаҳсулотларини чуқур қайта ишлаш корхоналарига 100 миллион доллар сармоя киритишга тайёр появились сначала на EastFruit.

Етти йилдан буён салат ва гиёҳлар етиштириш билан шуғулланувчи АҚШдаги энг йирик вертикал ферма  (Bowery Farming Inc.) ўз ассортиментини қулупнай билан бойитишга қарор қилди. Бу хусусда EastFruit Bloomberg ҳаволасига таяниб хабар бермоқда.

Резавор лойиҳаси Bowery асосчиси Ирвинг Фэйннинг сўнгги ташаббуси бўлиб, уни ишга тушириш учун инвесторлардан тахминан 650 миллион доллар йиғишга муваффақ бўлинди.  Фэйн вертикал фермерликнинг ҳақиқий фанатидир, унинг айтишича, бу иш далада ҳосил етиштиришдан кўра бир неча баробар самаралироқдир.

Bowery ҳозирги кунда иккита вертикал фермага эга ва яна учтасини қурмоқда. Февраль ойида компания сунъий интеллект ёрдамида бошқариладиган қулупнай йиғувчи роботларни ишлаб чиқарувчи Тraptic Inc.ni сотиб олганини эълон қилди. Ушбу хариддан мақсад, маҳсулотларнинг кенг ассортименти билан ишлаш технологиясини жорий қилиш ва вертикал фермада етиштириш мумкин бўлган маҳсулотлар (помидор, бошқа резаворлар, булғор қалампири, бодринг ва бошқалар) ассортиментини кенгайтиришдир.

Шунингдек ўқинг: Грузиядаги илк вертикал фермага виртуал саёҳат (видео)

Компания АҚШда қулупнай етиштирувчи илк вертикал ферма эмас. Бундан ташқари, у ўз шаҳри (Кирни, Нью-Жерси)да ҳам биринчи бўлмаган. Мисол учун, рақобатчи “Оishii” фермер хўжалиги 2018 йилдан буён қулупнай етиштириш билан шуғулланади ва ҳозирги кунда ўз ассортиментига қовун, булғор қалампири ва помидорни қўшиш масаласини кўриб чиқмоқда.

Oishii Кирнига Япония Алп тоғларидан ҳаммуассис Хироки Когой олиб келган Оmakase навли қулупнайларни етказиб беради.

“Келажакда кўплаб компаниялар бизнинг йўлдан боришини кутяпман. Бироқ, қулупнайнинг махсус япон навини таклиф қилишимиз бизнинг афзаллигимиз бўлиб қолади», дейди Хироки Когай.

Bloombergнинг хабар беришича, вертикал фермада етиштирилган қулупнайни татиб кўриш завқи ҳозирча арзонга тушмайди. Bowery ўз резаворини фақат танланган дўконлар ёки ресторанларда ҳар бир қадоқ учун 15 доллардан (тахминан 227 грамм) сотишни режалаштирмоқда. Аммо бу уларнинг Оishiiдаги рақобатчилари сўраётган нархдан камроқ: Оishii маҳсулотлари саккизта резавордан иборат қути учун 50 доллар миқдоридадир!

Сообщение АҚШдаги энг йирик вертикал фермада қулупнай етиштирилади появились сначала на EastFruit.

Ўзбекистон компаниялари АҚШ Халқаро ривожланиш Агентлиги (USAID) кўмагида АҚШ импортёрлари билан музокаралар олиб бормоқда, дея хабар берди АҚШнинг Ўзбекистондаги элчихонаси.

2022 йилнинг 8-10 февраль кунлари Ўзбекистоннинг учта йирик боғдорчилик маҳсулотлари экспортери ҳамда Ўзбекистон Экспортни рағбатлантириш агентлиги USAID молиявий кўмагида Калифорния штатининг Туларе шаҳрида ҳар йили бўлиб ўтадиган World Ag Expo кўргазмасида илк бор иштирок этди.

Мазкур сафарда Ўзбекистонлик компанияларга USAID стенд тўловларини молиялаштирди ҳамда потенциал ҳамкорларни топишда ёрдам берди. Кўргазма якунига кўра, ҳар уч компания АҚШ импортчилари билан музокараларга киришга муваффақ бўлди. Ўтган ҳафта компаниялардан бири АҚШнинг Нью-Йорк шаҳрида жойлашган озиқ-овқат импортчисига қиймати 1 миллион доллардан ортиқ бўлган миқдорда қуритилган мевалар, хусусан, ўрик қоқиси ва майиз етказиб бериш бўйича келишувга эришди. Яна бир компания Калифорниянинг Сан-Хоакин водийсида жойлашган West Hills College коллежи билан боғдорчилик соҳасидаги ишлаб чиқарувчилар билан ўзаро тажриба алмашув ташрифларини ташкиллаштириш борасида мулоқотларни бошлади.

Шунингдек ўқинг: Ўзбекистон карамнинг асосий турлари экспорти бўйича рекорд даражаларни қайд этишда давом этмоқда

Ўзбекистонда қишлоқ хўжалиги сектори бандликни таъминлаш борасида энг йирик иқтисодиёт тармоқларидан биридир. Мазкур сектор улушига ялпи ички маҳсулотнинг тахминан 27 фоизи тўғри келади ва у ишчи кучининг 25 фоизини иш билан таъминлайди. 2021 йилда Ўзбекистон қиймати 957,3 миллион АҚШ долларига тенг бўлган 1,5 миллион тонна мева-сабзавот экспорт қилди. Ушбу кўрсаткич 2020 йилга нисбатан 5,1 фоизга камайган. Мазкур маҳсулотлар экспортининг асосий қисми Россия, Қозоғистон, Қирғизистон, Хитой ва Покистонга юборилади. Ўзбекистон экспортчилари Ғарбий Европа ва АҚШнинг юқори даражада рақобатли бўлган ва юқори даражадаги сифатни талаб қилувчи бозорларига киришга қийналар эдилар. АҚШ озиқ-овқат импортчиси билан тузилган 1 миллион долларлик келишув, глобал миқёсда кичик бўлса-да, Ўзбекистон ва АҚШ ўртасидаги қишлоқ хўжалиги савдоси учун муҳим қадамдир. West Hills College коллежи билан ўрнатилган алоқалар ҳам муҳим аҳамиятга эга. Ўзбекистон ўз боғдорчилик соҳасини кенгайтирар экан, Американинг техник тажрибаси, асбоб-ускуналари ва қишлоқ хўжалиги жиҳозларидан фойдаланиш Ўзбекистон экспортчилари учун муҳим аҳамият касб этади.

World Ag Expo кўргазмасида 1200 дан ортиқ компания иштирок этади ва қишлоқ хўжалиги техникаси, маҳсулотлари, коммуникациялари ва технологияларининг энг сўнгги намуналарини намойиш этади.  Бу йил кўргазмада 65 мамлакатдан 100 мингдан ортиқ ташриф буюрувчи, йирик харидорлар ва чакана сотувчилар иштирок этди.

Сообщение USAID кўмагида ўзбекистонлик экспортерлар АҚШга 1 млн долларлик қуритилган мева етказиб беради появились сначала на EastFruit.

АҚШда Мексика авокадоси импорти таъқиқланиб, ички бозорда нархлар кескин кўтарилди, жаҳоннинг бутунлай бошқа бир қисмида – Ўзбекистонда эса ушбу мева 2 баробар арзонлашган. Бироқ, бу таъқиқдан аввал ҳам Ўзбекистонда авокадо нархи импорт божларининг бекор қилиниши туфайли қарийб 25 фоизга арзонлашган эди.

EastFruit таҳлилчилари ушбу омиллар қандай қилиб 3,5 ой аввал Ўзбекистондаги энг қиммат мевалардан бири ҳисобланган авокадонинг бир неча бор арзонлашувига олиб келганини тушунтириб беришди.

2021 йил октябрь ойининг биринчи ўн кунлигида Ўзбекистон ҳукумати бир қатор маҳсулотлар, жумладан, цитрус ва экзотик мевалар, хусусан, авокадо импортида божхона божи тўловларидан озод қилиш тўғрисида қарор қабул қилган эди. Ушбу ҳужжат қабул қилинишидан аввал мазкур турдаги меваларни олиб киришда 10–20 фоиз, бироқ, ҳар бир килограмм учун 0,2 доллардан кам бўлмаган божхона тўлови ставкаси қўлланган. Албатта, мамлакат ҳукуматининг мазкур қарори истеъмолчилар учун жуда ижобий аҳамият касб этди, чунки, Ўзбекистон иқлим шароити туфайли юқоридаги рўйхатга киритилган меваларнинг аксарият қисмини етиштира олмайди.

Шуни қайд этиш жоизки, Ўзбекистонда авокадо бугунги кунга қадар мамлакат супермаркетларида  доналаб сотилган ва сотилмоқда.

Божхона божларининг нолга туширилиши натижасида 2021 йилнинг ноябрь ойи бошидан декабрь ойи охирига қадар Ўзбекистонда авокадонинг чакана нархлари 1 донаси учун ўртача 24 000 сўмдан 18 000 сўмгача, яъни, 25 фоизга пасайган. Бу ўринда Ўзбекистонда энг кўп сотиладиган ва жаҳон бозорида арзон саналадиган яшил рангдаги авокадо навлари ҳақида сўз бормоқда.

2022 йилнинг биринчи ойларида эса жаҳон авокадо бозорида нархларнинг кескин тушиб кетиши рўй берди. Жаҳондаги энг йирик авокадо импортёри бўлмиш АҚШ, EastFruit мутахассислари қайд этганидек, Мексикадан ушбу маҳсулот импортини таъқиқлади. Мексика эса ўз навбатида, жаҳондаги энг йирик авокадо экспортёри ҳисобланади. Мексикадан АҚШга жами авокадо экспорти тахминан 3 миллиард долларни ташкил қилади, АҚШ импорт қиладиган жами авокадо бўйича Мексика улуши эса тахминан 90 фоизни ташкил қилади.

«АҚШда шундоқ ҳам авокадонинг рекорд даражадаги юқори нархлари, шунингдек, йилнинг шу даврида ушбу мевага бўлган талабнинг юқори даражаси фонида энг йирик етказиб берувчи давлатдан импорт тўхтатилгани, шубҳасиз, мамлакат супермаркетлари пештахталарида ушбу турдаги меванинг тақчиллигига олиб келади.  Мексика учун эса жаҳон бўйича денгиз контейнерларининг катта танқислиги шароитида тезлик билан бошқа харидор топиш ва етказиб беришни ташкил қилиш  имконсиздир. Зеро, Мексика АҚШнинг қўшниси ва жаҳондаги барча йирик авокадо етказиб берувчилар Қўшма Штатлардан анча узоқда жойлашган, шу маънода, ҳатто етказиб беришнинг ўзи ҳам, агар уни ташкил қилиш мумкин бўлса, кўп вақт талаб этади», дейди БМТнинг Озиқ-овқат ва қишлоқ хўжалиги ташкилоти (ФАО) инвестицион департаменти иқтисодчиси Андрий Ярмак.

Натижада, жаҳон бозорида Мексика авокадоси таклифлари ҳажми кўпайиб кетди ва Мексика авокадосининг таклиф нархлари кескин пасайди, АҚШда эса бу маҳсулот тақчиллиги юзага келди ва нархлар кўтарилиб кетди.

Ўзбекистонга қайтадиган бўлсак, 2022 йилнинг январь ойи бошидан февраль ойи ўрталарига қадар авокадонинг чакана нархлари 1 донаси учун 18 000 сўмдан 8800 сўмгача, яъни, 2 баробар пасайди. Шуни қайд этиш жоизки, EastFruit мутахассисларининг маълумотларига кўра, 8800 сўмдан авокадонинг «Hass» нави сотилмоқда.

Шундай қилиб, 2021 йилнинг ноябрь ойи бошидан 2022 йилнинг февраль ойи ўрталарига қадар икки омил – импорт учун божхона божларининг нолга туширилиши ва АҚШ томонидан Мексика авокадоси импортига таъқиқ қўйилгани туфайли Ўзбекистонда ушбу маҳсулотнинг чакана нархлари 1 донаси учун 24 000 сўмдан 8800 сўмгача, яъни, камида 2,7 баробар пасайган. Бошқача айтганда, бор-йўғи 3,5 ой ичида Ўзбекистонда энг қиммат мевалардан бири саналган авокадо қарийб 3 баробар арзонлашган.

Сообщение АҚШда Мексика авокадоси импорти таъқиқланганлиги Ўзбекистон истеъмолчиларига қўл келмоқда появились сначала на EastFruit.

Ўсимликлар хавфсизлиги бўйича инспектор АҚШга жўнатиш учун тайёрланган меваларни текшираётган маҳал унинг расмий телефонига таҳдидлар келиб тушгач, АҚШ Мексикадан авокадо импортини бутунлай таъқиқлаганини эълон қилди.

EastFruit таҳлилчиларининг маълумотига кўра, АҚШ бозорида Мексика авокадосининг ўрнини босиш деярли имконсиз, чунки, 2021 йил якунига кўра, АҚШ авокадо импортининг 92 фоизи Мексика улушига тўғри келди. Мексикадан АҚШга авокадо импорти ҳажми йил давомида жисмоний жиҳатдан 8% га ва қиймат жиҳатидан 25% га ошди.

“Албатта, бу Мексика мева-сабзавот бизнесига катта зарба бўлди, зеро, ушбу мамлакат учун авокадо асосий экспорт позицияси, АҚШ эса асосий бозор ҳисобланади. Мексика учун авокадонинг АҚШга экспорти 3 миллиард долларлик бизнесдир”, дейди БМТнинг Озиқ-овқат ва қишлоқ хўжалиги ташкилоти (ФАО) инвестицион департаменти иқтисодчиси Андрий Ярмак.

“АҚШда авокадонинг шундоқ ҳам рекорд даражадаги юқори нархлари, қолаверса, йилнинг шу давридаги  юқори талаб фонида энг йирик етказиб берувчи давлатдан импортнинг тўхтатилиши, шубҳасиз, мамлакат супермаркетларида ушбу меванинг тақчиллигига олиб келади. Жаҳонда денгиз контейнерларининг катта танқислиги шароитида тезлик билан янги харидор топиш ва етказиб беришни ташкил этиш Мексика учун имконсиздир. Зеро, Мексика АҚШнинг қўшниси ва жаҳондаги барча бошқа йирик авокадо етказиб берувчилар Қўшма Штатлардан анча узоқда жойлашган, ҳатто етказиб беришнинг ўзи, агар уни йўлга қўйиш мумкин бўлса, кўп вақт талаб этади. Шу боис, катта эҳтимол билан, яқин орада икки давлат бу муаммони ҳал этишга ҳаракат қилади”, дея қўшимча қилди Андрий Ярмак.

EastFruit таҳлилчиларининг қайд этишича, АҚШ жаҳондаги энг йирик авокадо импортёри ҳисобланади. Мексика эса энг йирик экспортёрдир. Шу сабабли, авокадо бозорининг икки йирик ўйинчиси ўртасидаги савдо-сотиқнинг тўхтатилиши ушбу бозор учун жиддий зарбадир.

Мексикадан АҚШга авокадо импортининг кутилмаганда тўхтатилгани шанба куни кечки пайт мексикалик авокадо етиштирувчилар учун йилнинг энг йирик савдоси имкониятини тақдим этувчи Америка футболидаги Суперкубок (Super Bowl) олдидан тасдиқланди. Тўғри, авокадо етказиб беришнинг кубок билан боғлиқ муаммоси йўқ, чунки, ушбу ҳажмлар АҚШга етказиб бериб бўлинган.

Америка оммавий ахборот воситаларининг хабар беришича, авокадо ҳудуд учун курашаётган гиёҳвандлик картелларининг сўнгги қурбонига айланган ва ғарбий Мичоакан штатидаги авокадо етиштирувчиларга товламачилик қилинган, бу штат Мексиканинг АҚШ бозорига ушбу мевани экспорт қилишга тўлиқ ваколати бор ягона штатидир. Мексика Қишлоқ хўжалиги вазирлигининг баёнотида айтилишича, АҚШ ҳукумати Мексикадаги карантин инспектори таҳдидли хабарни олгач, Мексика авокадосининг барча импортини тўхтатди.

«АҚШ соғлиқни сақлаш идоралари Мичоакан штатининг Уруапан шаҳрида текширув ўтказаётган мансабдор шахслардан бири расмий мобиль телефонига таҳдидли хабарни олгач, шундай қарорга келди«, деб ёзмоқда идора.

Импорт учун таъқиқ жорий қилиниши Мексика авокадо етиштирувчилар ва қадоқловчилар ассоциацияси бу йилги Суперкубок рекламасини намойиш этган кунга тўғри келди. Деярли ўн йил давомида мексикалик экспортёрлар Гуакамоле (Мексика ва АҚШда авокадо асосида тайёрланадиган анъанавий машҳур таом) истеъмолини Америка футболининг суперкубоги анъанаси билан доимий равишда боғлашга ҳаракат қилиб, қиммат реклама намойиш этишар эди.

Бу йилги рекламада Юлий Цезар ва бир гуруҳ  гладиаторлар фанатлари Колизей фонида тасвирланган. Улар Гуакамоле ва авокадодан татиб кўриб роҳатланишар экан, ўрталаридаги қарама-қаршиликни ҳал этишади.

Ушбу турдаги мева Қўшма Штатларда ҳам етиштирилганлиги сабаб, экспорт қилинадиган авокадо АҚШ экинларига зарар етказадиган касалликларга олиб келмаслигига ишонч ҳосил қилиш учун АҚШ инспекторлари Мексикада фаолият юритар эди. АҚШ  1914 йилдан буён Мексика авокадосига қўйилган таъқиқни 1997 йили олиб ташлаган. Ушбу таъқиқ Америка боғларига ҳашаротлар, қорақўтир ва бошқа зараркунандалар кириб келишига йўл қўймаслик учун жорий қилинган эди. Инспекторлар АҚШ қишлоқ хўжалиги вазирлигининг Ҳайвонлар ва ўсимликлар саломатлигини назорат қилиш хизматида ишлайди.

Бу, яъни Мичоакандаги зўравонликлар (Халиско картели Бирлашган картеллар деб номланувчи маҳаллий тўдаларга қарши уруш олиб бораётгани) штатдаги энг даромадли экин – авокадога таҳдид солаётган биринчи ҳодиса эмас.

2019 йилда юз берган аввалги шундай воқеадан сўнг USDA АҚШ инспекторларига нисбатан ҳужум ёки таҳдиднинг оқибатлари ҳақида огоҳлантирган эди. 2019 йилнинг август ойида бир гуруҳ USDA инспекторлари Уруапан ғарбидаги Зиракуаретиро шаҳрида «тўғридан-тўғри таҳдид» остида қолишган. Агентлик нима бўлгани ҳақида батафсил маълумот бермаган бўлса-да, маҳаллий ҳокимият вакилларининг айтишича, жиноий гуруҳ инспекторлар олиб кетилаётган юк машинасига қурол билан таҳдид қилган.

Ўшанда USDA мактубида «хавфсизлик қоидалари бузилишига олиб келадиган ёки АPHIS ходимларига жисмоний таҳдидни намоён этадиган келгусидаги вазиятларда биз дарҳол дастур фаолиятини тўхтатамиз» деб ёзилган.

Мичоакандаги кўплаб авокадо етиштирувчиларнинг айтишича, гиёҳванд моддалар савдоси билан шуғулланувчи тўдалар фермерлар ёки уларнинг оила аъзолари ҳимояси учун пул тўланмаса, ўғирлаш ёки ўлим билан таҳдид қилади, баъзан бу пул бир акр учун минг долларгача етади.

2020 йилнинг 30 сентябрь куни Мексикадаги APHIS ходими шимолий чегарадаги Тихуана шаҳри яқинида ўлдирилган эди.

Мексика прокурорлари марҳум Эдгар Флорес Сантосни гиёҳванд моддалар савдоси билан шуғулланувчи тўда полициячи билан адаштирган ва ўлдирган бўлиши мумкинлигини,  гумондор ҳибсга олинганини айтган. АҚШ Давлат департаментининг таъкидлашича, тергов «ушбу бахтсиз ҳодиса жаноб Флорес нотўғри вақтда ва нотўғри жойда бўлганлиги сабаб юз берди«, деган хулосага келган.

Сообщение Жаҳон авокадо бозоридаги хаос – АҚШда Мексикадан барча импорт тўхтатилди появились сначала на EastFruit.

Ёнғоқ ҳосили йиғиб олиниб, саноат корхоналарида пўстлоғидан тозалангач, кўплаб чиқитлар қолади. Қаттиқ, юпқа ва жуда секин парчаланадиган ёнғоқ пўстлоғи, одатда, чиқиндига ташланади. Аммо Вашингтон давлат университети олими Викрам Ядама шкаф, стол ва бошқа мебель қисмлари учун мустаҳкам панеллар ясашда ёнғоқ пўстлоғини қайта ишлашнинг янги усулини топди.

WSU композит материаллар муҳандислик марказида Ядама ва тадқиқотчилар гуруҳи пўстлоқ, тола ҳамда сомон каби қишлоқ хўжалиги чиқиндиларини смола билан мустаҳкамланган меъморий ҳамда декоратив панелларга айлантирмоқда. Прессланган толали панеллар ишлаб чиқаришда фундук пўстлоғини ҳам синовдан ўтказаётган ишлаб чиқарувчилардан бири ушбу технологияга қизиқиб қолган, деб хабар бермоқда АgrоХХI.

«Стол ёки шкафлар учун панеллар ясаётганингизда бир нечта жиҳатлар жуда муҳим», дейди Ядама.

«Панеллар муайян бир оғирликдаги юкка бардош берадиган даражада мустаҳкам бўлиши керак. Улар винтлар ёки маҳкамловчи деталларни ушлаб туриши лозим, шунингдек, вақт ўтиши билан оғирлик туфайли эгилувчанлик даражаси минимал бўлиши зарур. Ва албатта, чиройли бўлиши ҳам муҳим».

Ўрмон ёнғоғи экологик жиҳатдан хавфсиз ва мустаҳкамлик, маҳсулдорлик ҳамда гўзаллик уйғунлигини намоён этади, прототип-панелларга ажойиб қизғиш-жигарранг тус беради.

«Пўстлоқ таркибида жуда кўп углерод мавжуд», дейди Ядама. «Уларнинг парчаланишини тўхтатсангиз, углерод ажралишини кечиктирасиз.  Агар биз материал чиқиндига тушишининг олдини олсак ва шу билан бирга, кўпроқ дарахтлар ўстиришда давом этсак, бу  бизга узоқ муддат ёрдам беради”.

Жамоа ҳозир панелдаги  смола миқдорини минималлаштириб, табиий ингредиент миқдорини максимал даражада ошириш устида ишламоқда. Шу билан бирга, охир-оқибат, углерод чиқиндиларининг нейтрал даражаси билан биологик асосдаги смолаларни қўллаш режалаштириляпти.

Лойиҳани шу йил қишда якунламоқчи бўлган Ядама ҳам маҳсулот, ҳам тижорат миқёсида кенгайтирилиши мумкин бўлган ускуна прототипини ишлаб чиқмоқда. Ишланма муваффақиятли бўлса, мижозлар тез орада ёнғоқ пўстлоғидан тайёрланган стол ёки стул сотиб олишлари мумкин.

“Бу ҳамкорларимиз билан  фундук қобиғидан янги  панеллар яратиш борасидаги ажойиб тажриба бўлди. Архитектура ва дизайн мижозлари биз кўрсатган прототипларни жуда ёқтиришди ва биз ушбу янги турдаги материални ишлаб чиқаришга тайёрлаб бўлгач, катта муваффақиятга эришишни кутмоқдамиз”, дея хулоса қилди у.

Сообщение Фундук пўстлоғидан мебель – америкалик тадқиқотчилардан янги технология появились сначала на EastFruit.

Wish Farms (Флорида) –  резавор етиштирувчи халқаро компания Pink-А-Boo Pineberries® савдо белгиси остидаги қулупнай тарғиботи учун маркетинг кампанияси бошланганини эълон қилди.

Pink-А-Boo Pineberries® савдо белгисининг номланиши резаворнинг пишиб етилган пушти рангига ишора қилувчи сўз ўйинидир, чунки, қулупнай оқ рангда бўлиб, пишиб етилганида пушти тусга киради. Резавор таркибидаги шакар миқдори анъанавий навларга қараганда бироз юқори, ананас, нок ва ўрик ноталарининг нозик таъмини эслатади, деб ёзмоқда FruitNews FreshFruitPortal материалларига асосланиб.

“Ўйлайманки, янги резавор  Wish Farms ва чакана савдо ҳамкорларимиз учун энг машҳур маҳсулотлардан бирига айланади. Жамоамиз куч-қувватга тўла ва биз муваффақиятга эришиш учун бор салоҳиятимизни ишга соламиз.  Бозорда Pink-А-Boo Pineberries®ни илгари суришга хизмат қилувчи маркетинг стратегиясини ишлаб чиқдик”, дейди компания директори Гэри Вишнацки.

Pink-А-Boo Pineberries® қадоғида пишган ананас тасвирланган ва қўшимча урғу бериш учун «Ripe and Ready» ибораси қайд этилган.

Резавор Флорида университетида анъанавий селекция усулларидан фойдаланган ҳолда етиштирилган. Кўп йиллар аввал ишнинг бошида олимлар ҳаммага таниш қизил қулупнайни ёввойи оқ қулупнай билан чатиштиришган, кейин эса ҳосил бўлган шакллар билан селекция давом эттирилган. Wish Farms янги резаворлар ёрлиғига «ГМО эмас» деган ёзувни қайд этишга қарор қилди.

“Мижозлар ёрқин қизил рангли қулупнайни излашга ўрганиб қолган, шунинг учун бизнинг вазифамиз истеъмолчига янги мева ҳақида кенг маълумот беришдир. Ёрлиқдаги эслатмалар ва информацион қайдларга қўшимча равишда биз ижтимоий тармоқларда маълумот тарқатишни режалаштирмоқдамиз», дея қўшимча қилди Wish Farmsнинг маркетинг бўйича директори Эмбер Мэлоуни.

2020 йилда Wish Farms қулупнай етиштириладиган майдонни 324 гектарга оширди. Тахминан 3 гектарга оқ қулупнай (Pink-А-Boo Pineberries®) экилган. Ушбу қулупнай ҳосил йиғим-терим мавсуми декабрдан апрелгача давом этадиган Флорида штатида 40 гектардан (100 акр) ва Калифорнияда 60 гектардан (150 акр) ортиқ майдонда етиштирилмоқда. Бу ерда резавор январь ойидан июнгача, сўнг кузда йиғиб олинади.

Сообщение АҚШда оқ қулупнай – Pink-А-Boo Pineberries®нинг тарғибот кампанияси бошланди появились сначала на EastFruit.

АҚШ Қишлоқ хўжалиги вазирлигининг Озуқа ва қишлоқ хўжалиги Миллий институти (NIFA) яқинда картошка сифати ва унинг зараркунандаларга қарши чидамлилигини ошириш учун махсус тадқиқот грантлари дастури доирасида 4 та грант ажратди.

Бу хусусда АgroTimes NIFA расмий сайтига ҳаволасига таяниб ёзмоқда.

2021 йилнинг 1 сентябридан 2023 йилнинг 31 августигача бўлган даврда картошка етиштириш бўйича тўрт дастурга жами 2,666 миллион доллар ажратилди.

Грантлар классик селекция ва илғор молекуляр ҳамда биотехнологик ёндашувлардан фойдаланган ҳолда энг яхши тижорат картошка навлари (Solanum tuberosum L.)ни ишлаб чиқиш ва синовдан ўтказишга қаратилган бўлиши керак.

Грантлар қуйидаги университетларда картошка етиштириш дастурларига берилади:

Вашингтон штати университети (Уч штат наслчилик дастури): 943 000 доллар

Мичиган штати университети: 797 000 доллар

Мэн университети: 510 000 доллар

Техас А&М университети: 415 000 доллар

Тадқиқот картошка сифатини яхшилаш ва унинг зараркунандалар ҳамда  касалликларга қарши чидамлилигини оширишга кўмак беради. Бу эса тижорат навларини ривожлантириш ва ишлаб чиқарувчиларга яхши материаллар юборишга олиб келади.

NIFA АҚШ қишлоқ хўжалигининг жаҳон миқёсидаги катта муаммоларни ҳал қилишга тайёр бўлишини таъминлаш учун ўсимликлар селекцияси, генетика ва геномика соҳасидаги сўнгги тадқиқотларни қўллаб-қувватлайди. Қишлоқ хўжалигидаги инновациялар атроф-муҳитга камроқ таъсир қилувчи озиқ-овқатларни кўпроқ ишлаб чиқаришнинг калитидир.

Сообщение АҚШда картошка селекцияси бўйича дастурларга 2,6 миллион доллардан ортиқ маблағ сарфланади появились сначала на EastFruit.

EastFruit таҳлилчилари хабарига кўра, 2021/22 йилги мавсумда хандон пистанинг жаҳон бозоридаги юқори глобал талабни тўлиқ қондиришда маълум бир танқислиги кузатилади.

Дарҳақиқат, жаҳон хандон писта савдосида атиги икки давлат – АҚШ ва Эрон катта ҳажмга эга, улар иккиси бўлиб йилига  300-350 минг тонна хандон писта экспорт қилади. Хандон пистанинг мева бериш даврийлиги аниқ бўлгани учун  уни етиштириш ҳажми йилдан-йилга катта фарқ қилади. Бироқ, сўнгги пайтларда хандон пистанинг мева бериш даврийлиги омилига иқлим ўзгаришидан кўрилаётган зарар омили ҳам қўшилди.

“2021 йилда Эронда хандон писта ҳосили баҳорги аёздан шикастланиши ва ёздаги аномал юқори ҳарорат туфайли кескин камаяди. Бундан ташқари, етиштириш ҳажмининг пасайиши билан бир қаторда Эрон хандон пистасининг сифати билан боғлиқ муаммолар ҳам кутилмоқда, бу эса АҚШлик хандон писта экспортёрларига қўл келади, у ерда даврийликка қарамай, хандон пистанинг юқори ҳосилдорлиги кутилмоқда. Яъни, 2021 йилда АҚШда хандон писта ҳосили паст бўлиши кутилган эди, лекин, аслида, ўтган йилгидан у қадар паст бўлмайди. Шунга қарамай, АҚШда ҳам худди Эрондагидек хандон писта етиштириш камаяди, бу эса жаҳон бозоридаги хандон писта билан боғлиқ таклифлар камайишини англатади», дейди Бирлашган Миллатлар Ташкилоти қошидаги Озиқ-овқат ва қишлоқ хўжалиги ташкилоти (ФАО)нинг инвестицион департаменти иқтисодчиси Андрий Ярмак.

Шунингдек ўқинг: АҚШ 2021 йилда хандон писта экспортини 40 фоизга оширади

Қизиғи шундаки, 2020/21 йиллар мавсуми хандон писта экспорти учун жаҳон рекорди даражасида бўлди. АҚШ ҳам, Эрон ҳам хандон пистадан юқори ҳосил олди, унинг сифати жуда яхши эди. Эрон хандон писта ассоциацияси маълумотларига кўра, 2020/21 йилги мавсумда жаҳондаги оғир логистик вазият ва мамлакатдаги макроиқтисодий ҳолатга қарамай, Эрон ҳукуматини валюта айирбошлашда сезиларли чекловлар қўйишга мажбур қилган хандон писта экспорти рекорд даражада бўлди ва 230 минг тоннага етди. Бундай юқори экспорт ҳажми ташкилотни 2020 йилда хандон писта етиштириш бўйича ҳисоб-китобларни 190 минг тоннадан 243 минг тоннагача кескин оширишга ундади. 2021 йилда эса ҳосил 150 минг тоннадан ошмаслиги кутилмоқда, бироқ ноябрь ойида йиғим-терим якунланганидан сўнг экспертлар ҳосил ҳисоб-китобларининг янада камайишини истисно этишмаяпти.

Турли манбаларга кўра, АҚШда 2021 йил хандон писта ҳосили ҳажми 2020 йилда уни етиштирувчилар йиғиб олган 477 минг тоннадан 400-430 минг тоннага камайиши мумкин.

Шундай қилиб, икки етакчи давлат ўтган йилга нисбатан 150 минг тонна кам хандон писта ҳосилини олади, бу эса хандон писта бўйича жаҳон экспортининг деярли ярмини ташкил этади.

АҚШнинг Калифорния штатида хандон писта қандай етиштирилишини EastFruitнинг ушбу видеосида томоша қилинг. Эслатиб ўтамиз, Ўзбекистонда хандон писта етиштириш бўйича катта режалар мавжуд ва Грузияда 2021 йилдаёқ, тижорат плантацияларидан хандон пистанинг биринчи ҳосилини йиғиб олиш режалаштирилмоқда. Шу билан бирга, Грузияда ҳатто хандон писта етиштирувчилар ассоциацияси ҳам мавжуд. Ушбу турдаги қуруқ мевани етиштириш бўйича тажрибалар Украина ва Молдовада ҳам ўтказилмоқда.

Сообщение Жаҳон хандон писта бозори: Эроннинг рекордлари ва муаммолари, АҚШдаги муваффақиятли камҳосил йил появились сначала на EastFruit.

АҚШ Қишлоқ хўжалиги вазирлигининг қишлоқ хўжалигини тадқиқ қилиш хизмати (АRS) ва Берклидаги Калифорния университети олимлари мева-сабзавотларни музлатишнинг янги усули борасида тадқиқот олиб боришди. Тадқиқот натижаси озиқ-овқат маҳсулотлари хавфсизлиги ва сифатини таъминлашга, шунингдек, энергияни тежаш ва углерод чиқиндиларини камайтиришга хизмат қилади.

Изохор усулида музлатиш озиқ-овқат маҳсулотларини герметик, қаттиқ идишда сақлаш бўлиб, идишлар, одатда, қаттиқ пластмасса ёки металлдан ясалади ва ичи тўлиқ суюқлик, масалан, сув билан тўлдирилади. Оддий музлатишдан фарқли ўлароқ, унда мева-сабзавотлар ҳаво таъсирига тушади ва нолдан паст ҳароратда қаттиқ ҳолатга қадар музлайди. Изохор музлатиш озиқ-овқатни қаттиқ музга айлантирмасдан сақлайди. Озиқ-овқат сув тўла идишда экан, у музнинг кристалланишидан ҳимояланган бўлади ва мева структураси бузилмайди. Бу хусусда FruitNews хабар бермоқда.

«Жаҳон бўйлаб озиқ-овқат маҳсулотларини изохор музлатишга тўлиқ ўтиш энергия сарфини йилига 6,5 миллиард киловатт-соатга камайтиради. Шу билан бирга, углерод чиқиндиларини 4,6 миллиард кгга камайтиради. Қисқариш озиқ-овқат маҳсулотларини тўлиқ қаттиқ ҳолатгача музлатиб қўйиш зарурати йўқлигидан келиб чиқади. Зеро, бу катта энергия сарфини талаб қилган бўлар эди. Шунингдек, муз кристалларидан сақланиш учун совутгични музлатишдек кўп энергия талаб қиладиган протоколларга мурожаат қилишнинг ҳожати йўқ. Агар ишлаб чиқарувчилар янги концепцияни қабул қилишга рози бўлишса, музлатилган озиқ-овқат маҳсулотларини ишлаб чиқариш учун мавжуд ускуналар ва инфратузилмада жиддий ўзгаришларсиз энергия тежашга эришиш мумкин», дейди АRS озиқ-овқат маҳсулотлари тадқиқотчиси Кристина Бильбао-Сайнс.

Изохор музлатиш, шунингдек, помидор, гилос ва картошка каби сархил маҳсулотларни яхши сақлаш имконини беради. Бундай музлатишнинг яна бир афзаллиги шундаки, у қайта ишлаш жараёнида  микробларни йўқ қилади.

«Музлатилган маҳсулотлар ишлаб чиқаришнинг барча тармоқлари изохор музлатишдан фойдаланиши мумкин – ишлаб чиқарувчидан тортиб, то қайта ишловчилар, улгуржи ва чакана сотувчиларгача. Харидор маҳсулотни уйга олиб келганидан кейин ҳам у музлатгичда сақланиб туради. Кўплаб афзалликлари билан мазкур инновацион концепция амалга ошса, бу озиқ-овқат маҳсулотларини музлатиш борасидаги янги инқилоб бўлиши мумкин» дея қўшимча қилди тадқиқот ҳамраиси, WRRC маркази директори, Тара МакХью.

Берклидаги Калифорния университетининг механик- муҳандиси Мэтью Пауэлл-Палм тадқиқотнинг асосий муаллифларидан бири. Унинг қайд этишича, изохор музлатиш нафақат озиқ-овқат саноатида, балки тиббиёт, биология ва ҳатто космик саёҳатларда ҳам қўлланиши мумкин.

Сообщение АҚШда мева-сабзавотларни изохор усулида музлатишнинг янги технологияси тақдим этилди появились сначала на EastFruit.