Европа озиқ-овқат ва озуқа-ем ҳақида тезкор огоҳлантирув тизими (RASFF)нинг жорий йил биринчи чорагидаги маълумотларига кўра, рад этилган мева-сабзавотларнинг 60 фоизи Туркия ҳиссасига тўғри келмоқда. Чунки, улар таркибида ЕИ фойдаланишга рухсат бермаган ингредиентлар мавжуд. Одатдагидек, Европа Иттифоқида рухсат этилган агрокимёвий фаол моддалар (MRLS)нинг қолдиқлари максимал чегарадан ошиб кетгани қайд этилмоқда. Бу хусусда Fruit-inform FreshPlaza ҳаволасига таяниб хабар берди.

Биринчи чоракда Европа Иттифоқи мамлакатлари мева-сабзавот импорт қиладиган мамлакатларга берган 298 та огоҳлантирувдан 180 таси Туркия ҳиссасига тўғри келмоқда. Бундан ташқари, бу рақамлар тобора ортиб боряпти. Агар февраль ойида 45 та рухсат этилган чекланган концентрация (РЭЧК) меъёридан ошиб кетиши ҳолатлари аниқланган бўлса, март ойида бундай ҳолатнинг 74 таси қайд этилди. Пестицидларнинг ортиқча миқдори, асосан, цитрус меваларда қайд этилган. Энг кўп аниқланган модда метилхлорпирифос ёки хлорпирифосдир. Ушбу модда Европада тақиқланган.

LA UNIÓ de Llauradors (Испаниянинг Валенсия вилоятидаги Фермерлар иттифоқи) бош котиби Карлес Периснинг айтишича: «Маълумотлар ҳақиқатан ҳам, эътироз билдиришга арзийди ва бу Туркия импорти чуқур текширувдан ўтказилмагунча  тўхтатилиши кераклигини кўрсатмоқда».

Март ойи бошида LA UNIÓ Европа комиссияси ва Испания ҳукуматига Туркия мева-сабзавотлари импорти тўхтатилишини сўраб мурожаат қилган эди. Шунга ўхшаш мурожаатлар Европа Иттифоқининг соғлиқни сақлаш ва озиқ-овқат хавфсизлиги сиёсатига масъул шахс – Sante бош директори, Қишлоқ хўжалиги вазирлигининг қишлоқ хўжалиги маҳсулотларини етиштириш бўйича соғлиқни сақлаш бош директорига ҳам юборилган.

Ташкилот, шунингдек, турк мева-сабзавотларининг текширув частотаси 50 фоизга оширилишини ва тариф асимметрияси тугатилишини сўради. Чунки, Туркия Европа Иттифоқига 20% тариф билан экспорт қилса, Испания Туркияга экспорт учун 54% тариф тўлаши керак.

Сообщение Европа Иттифоқида рад этилган жами мева-сабзавотларнинг 60 фоизи ҳануз Туркия ҳиссасига тўғри келмоқда появились сначала на EastFruit.

LA UNIÓ de Llauradors фермерлар ташкилоти  эълон қилган маълумотларга кўра, яқинда Испаниянинг Валенсия минтақасида қайд этилган совуқлар 50 миллион евродан зиёд зарар келтирган. Бу тинимсиз ёмғирлар туфайли кўрилган 11 миллион евро зарарга қўшимча бўлди, деб хабар бермоқда EastFruit FreshPlaza ҳаволасига таяниб.

LA UNIÓ маълумотларига кўра, совуқ туфайли 33 минг гектардан ортиқ майдонга зарар етган. Ҳаммадан кўпроқ 64% майдон билан Валенсия провинцияси  зиён кўрган. Бундан ташқари, Кастельон 27% ва Аликанте 11% майдон билан совуқдан жабрланган.

Шунингдек ўқинг: Молдова жанубида баҳорги совуқ туфайли бодом, ўрик ва гилоснинг айрим навлари ҳосили камаяди

Зарар кўрган плантацияларнинг кўп қисми, яъни, 80%и бодом дарахтлари, яна 10%и кумкват, 8%и ёзги мевалар ва гилос, 2%и сабзавот (картошка, пиёз ва артишок) лардир. Бироқ, кумкват етиштирувчилар энг катта йўқотишларга дучор бўлишади, чунки, ҳосилнинг камида 50%и бой берилади ва агар энг ёмон прогнозлар тасдиқланса, бу кўрсаткич янада юқори бўлиши мумкин.

Бодом дарахтларига зарарнинг 37%и, сўнгги ҳафталардаги ёмғирдан жиддий зарар кўрган ёз меваларига зарарнинг 7%и, сабзавотларга эса 5%и тўғри келган.

LA UNIÓ ноқулай об-ҳаво шароитидан (аввал ёмғир, сўнг аёз) зарар кўрганларга  мумкин бўлган молиявий ёрдам кўрсатилишини сўрамоқда, шунингдек, жабрланган кооперативларга компенсация тўлаш ҳақида сўз юритмоқда.

Совуқ билан боғлиқ зарар амалдаги қишлоқ хўжалиги суғуртаси тизими томонидан қопланади. Ва LA UNIÓ Аgroseguroдан шикастланган ҳудудларни зудлик билан текшириш ҳамда ҳақиқий вазиятни ҳисобга олган ҳолда компенсацияга тузатишлар киритилишини сўради.

Сообщение Валенсия (Испания)да баҳорги совуқлар етказган зарар 50 миллион евро ҳисобланмоқда появились сначала на EastFruit.

Ўзбекистонда испан технологиялари асосида мандарин ва зайтун кўчатлари етиштирилиши режалаштирилмоқда, ўзбекистонлик агрономлар эса Испанияда малака оширади. Бундан ташқари, Ўзбекистонда 5 гектар майдонда совуққа чидамли мандарин навининг экспериментал плантациясини яратиш кўзда тутилган, деб хабар бермоқда EastFruit экспертлари Миллий ахборот агентлиги маълумотлариган таяниб.

Аввал хабар қилинганидек, айни пайтда Ўзбекистон Қишлоқ хўжалиги вазирлиги ҳузуридаги Боғдорчилик ва иссиқхона хўжалигини ривожлантириш агентлиги директори бошчилигидаги делегация уруғчилик, кўчатчилик ва агрономлик бўйича етакчи компаниялар тажрибаси билан танишиш ва малака ошириш мақсадида Испания мамлакатида бўлиб турибди.

Агентлик матбуот хизмати маълумотига кўра, Ўзбекистон делегацияси ташрифнинг дастлабки кунида Андалусия провинциясининг Кордова шаҳрида жойлашган Евросемиляс компаниясида бўлди. Мазкур корхона уруғчилик, кўчатчилик ва соҳа учун мутахассислар тайёрлашда илғор ҳисобланади.

Евросемиляс компанияси раҳбарияти билан учрашув давомида мамлакатимизда корхона тажрибаси асосида мандарин, зайтун, писта кўчатларини етиштириш бўйича келишувга эришилди. Ўз навбатида, агрономлар малакасини ошириш бўйича меморандум имзоланди. Корхона раҳбари Хосе Мария Фонтан яқин кунларда Ўзбекистонга ташриф буюришини маълум қилди.

Делегация аъзолари шунингдек, зайтун, мандарин, писта етиштириладиган боғларда бўлиб, ўзига хос технология, иш усули, кўчатчилик борасидаги янгича ёндашувлар билан яқиндан танишдилар. Вакилларимиз мандариннинг совуққа чидамли навини Ўзбекистонда 5 гектар ер майдонида тажриба тариқасида экишни режалаштирмоқдалар.

Сообщение Ўзбекистонда 5 гектар ер майдонида экспериментал мандарин плантацияси барпо этилади появились сначала на EastFruit.

Яқин кунларда Ўзбекистон Испания тажрибаси ва технологияларидан фойдаланган ҳолда 1 гектар майдонда экспериментал сарсабил плантациясини яратишни режалаштирмоқда, дея хабар берди EastFruit мутахассислари.

Айни пайтда Ўзбекистон Қишлоқ хўжалиги вазирлиги ҳузуридаги Боғдорчилик ва иссиқхона хўжалигини ривожлантириш агентлиги директори бошчилигидаги делегация уруғчилик, кўчатчилик ва агрономлик бўйича етакчи компаниялар тажрибаси билан танишиш ва малака ошириш мақсадида Испания мамлакатида бўлиб турибди. Бу хусусда Миллий ахборот агентлиги материалида қайд этилган.

Манбага кўра, делегация вакиллари вакиллари Гранада вилоятининг Фуента Вакереос қишлоғидаги спаржа (сарсабил) етиштириш бўйича Европанинг етакчи корхонаси – Еsparrago de granada корхонасида ҳам бўлдилар. “Еsparrago de granada” корхонаси раҳбари Алипио Арчиниега Лопез мулоқот мобайнида бу маҳсулотни Ўзбекистон шароитида етиштириш мумкинлигини таъкидлаб, ўзбек ҳамкасбларига спаржа етиштириш технологиясини беришини ва испанлар тайёр маҳсулотнинг ҳаммасини сотиб олишга тайёрлигини маълум қилди. Яқин кунларда бу маҳсулотнинг уруғини юртимизга олиб келиб, тажриба сифатида 1 гектар ер майдонига экиш режалаштирилмоқда.

Қайд этиш жоизки, EastFruit мутахассислари 2021 йилнинг май ойида Ўзбекистонда сарсабилни даромадли етиштириш истиқболлари ва нафақат ички бозорда сарсабил истеъмолини ошириш ҳисобига, балки, уни экспорт қилиш эвазига ҳам даромад олиш мумкинлиги ҳақида батафсил маълумот берган эди. Портал таҳлилчилари сарсабил жаҳондаги энг «тренд» сабзавотлардан бири эканлигини қайд этишган, зеро, унинг истеъмоли тез ўсиб бормоқда ва фермерлар сарсабил етиштиришдан яхши даромад олишмоқда.  Хусусан, Шарқий Европа мамлакатларида сарсабилнинг оммабоплиги уни етиштиришга қараганда тезроқ ортиб боряпти, шунинг учун бу ерда мазкур маҳсулот нархи Европа Иттифоқига нисбатан икки-уч баробар юқоридир. Бу ерда сарсабил узоқ вақтдан бери анъанавий баҳор маҳсулоти ҳисобланади.

Сообщение Ўзбекистонда Испания тажрибаси ва технологияси асосида спаржа (сарсабил) етиштирилади появились сначала на EastFruit.

Валенсиянинг Laserfood компанияси Испанияда ҳайвон териси ўрнини босувчи хурмодан тайёрланган биринчи веган терини ишлаб чиқаришни йўлга қўймоқда.

PersiSKINнинг янги маҳсулоти 100% табиий хом ашёдан тайёрланган веган терисини ишлаб чиқариш орқали Валенсия далаларида етиштирилган ортиқча ҳажмдаги хурмо муаммосига ечим таклиф этмоқда. Бу хусусда AgroXXI agroinformacion.com портали ҳаволасига таяниб хабар берган.

Ҳозирги кунда ўсимлик материалини тақдим этишнинг дастлабки босқичида бўлган компания маҳсулот ва уни ишлаб чиқиш учун патентга 500 000 евро сармоя киритди.  Келгуси ойларда 2022 йилнинг майида бошланадиган ишлаб чиқаришнинг биринчи босқичига 2 миллион еврогача қўшимча маблағ сарфлаш режалаштирилган.

«Ушбу иккинчи босқичда биз тайёр маҳсулот ишлаб чиқариладиган биринчи фабрикани очишимиз ва сотувни йўлга қўйишимиз мумкин», дейди Laserfood компаниясининг бош директори Хайме Санфеликс.

Валенсия Испанияда хурмо етиштирувчи асосий ҳудуд бўлиб, миллий ҳосилнинг 85%и, яъни ҳар йили 300 минг тоннадан зиёд мева ҳосили йиғиб олинади.

Сўнгги беш йил ичида хурмо ҳосили тез суръатлар билан ўсиб борди, бунинг натижасида йиллик маҳсулотнинг 50% дан ортиғи сотилмайдиган ортиқча маҳсулотга айланди.

Валенсиянинг агроозиқ-овқат секторидаги бундай вазиятга дуч келган PersiSKIN вакиллари чиқиндисиз иқтисодиётнинг барқарор вариантини топишди.

Бошқа томондан, корхона янги материаллардан фойдаланиш бўйича ёрдамчи сектор яратиш, масалан, кийим-кечак, пойабзал ишлаб чиқариш цехларини очишга кўмаклашиш, шу орқали юзлаб янги иш ўринларини яратишга ҳам интилмоқда.

Маҳсулот Испания тадқиқотлар, инновациялар ва тўқимачилик саноати компаниялари учун илғор техник хизматлар маркази –  АITEX иштирокида яратилган.

Сообщение Испания компанияси хурмодан тери ўрнини босувчи материал ишлаб чиқаришни йўлга қўяди появились сначала на EastFruit.

Перпиньяне (Франция)даги MIN бозорида мева-сабзавотлар орасида ноодатий апельсин сотилади. Шоколадли апельсин, ўз номидан кўриниб турганидек, жигарранг тусда бўлиб, бу харидорларни ўзига жалб қилмасдан қолмайди. “Бу Испанияда етиштириладиган апельсиннинг Navel навидир. Бундан 10 йил аввал валенсиялик боғбон тасодифан ушбу навни кўриб қолади. Кейин эса ундан гибрид нав ундириб чиқаради ва етиштира бошлайди. Бошида бу навни фақат ўша боғбон етиштирар эди. Ҳозир эса улар уч киши”, – дея тушунтирди Indiana Import компаниясининг савдо бўйича директори Жюльен Кремер (Julien Cremer).

Бу йил мазкур маҳсулот учун алоҳида бозорча очилди. “Бу жуда қизиқарли апельсин нави. Биз 7 йилдан буён ушбу навни етказиб берамиз ва унга талаб ўсишда давом этмоқда. Унинг таъми одатдаги апельсиндан фарқ қилади. Шоколадли апельсиннинг мазаси ширинроқ ва ўта нордон эмас. Оригиналлиги ва бироз танқислиги сабабли, табиийки, у қимматроқ сотилади”, дейди мутахассис.

Унинг айтишича, оддий апельсин 1,30 евро/кг ($1,47/ кг), шоколадли апельсин эса салкам 2,80 евро/кг ($3,16/ кг) нархда сотилмоқда.

Шунингдек ўқинг: Маймунжон, малина ва олча энди уруғсиз ва данаксиз – АҚШ селекционерлари бу борада изланишмоқда

EastFruitнинг FreshPlaza маълумотларига таяниб ёзишича, апельсин мавсуми икки ҳафта аввал бошланди ва 2-3 ой давом этади. Бу давр мобайнида Indiana Import мунтазам равишда Côté Nature ва Open Agro брендлари остида шоколадли апельсин етказиб беришни режалаштирган. Январь ойидан бошлаб эса Indiana Import маҳсулотлари орасида яна бир ғайриоддий мева – Испаниядан келтирилган қизил пўстли лимон ҳам қўшилади.

Сообщение Испанияда етиштирилган шоколадли апельсинлар оддийларига қараганда қимматроқ нархда сотиляпти появились сначала на EastFruit.

Ўзбекистоннинг Испаниядаги элчихонаси Тошкент вилоятининг Қибрай туманида “Fruit Season Group” МЧЖ ҳамда Испаниянинг “INGESER” ва “KHESH Investment partners” компаниялари билан ҳамкорликда агрологистик мажмуа қуриш лойиҳасини амалга ошириш устида иш олиб борди. Бу хусусда “Дунё” ахборот агентлиги  мухбири хабар бермоқда.

Шартнома имзолаш маросими Мадриддаги элчихонада бўлиб ўтди. “Fruit Season Group” МЧЖ бош директори Анвар Муҳамедов, “KHESH Investment partners”  ижрочи директори Паола Пазос ва “INGESER” бош директори Игнасио Дусмет  55 миллион долларлик лойиҳани амалга ошириш бўйича уч томонлама шартнома имзолади. Ушбу лойиҳа мева-сабзавот маҳсулотларини навларга ажратиш, саралаш, қадоқлаш ва музлатиш учун энг замонавий линиялар билан жиҳозланган 13 минг тонналик қувватга эга совутгич мажмуасини, сабзавот экинлари кўчатларини етиштиришга мўлжалланган 10 гектар майдонда замонавий иссиқхона мажмуасини, шунингдек, мева-сабзавот маҳсулотларини қайта ишлаш (пюре ва консерва тайёрлаш) мажмуасини қуришни назарда тутади.

Шунингдек ўқинг: Ўзбекистонда пиёз нархи сўнгги икки ҳафта ичида 25 фоизга қимматлашди

Келгусида тарқатув маркази қуриш ҳисобига лойиҳани кенгайтириш режалаштирилган. Маҳсулотларнинг 90 фоиздан ортиғи экспорт қилиниши кутилмоқда. Лойиҳа Испаниядаги инвестиция фондлари маблағлари ҳисобидан амалга оширилади.

«INGESER» 40 йилдан ортиқ тажрибага эга испан компаниясидир. Компания ҳисобида шаҳарсозлик, озиқ-овқат, фармацевтика, логистика ва архитектура соҳаларида самарали ечимларни лойиҳалаш, бошқарув, шунингдек, лойиҳаларни амалга оширишни мувофиқлаштириш борасида амалга оширилган 3000 дан ортиқ лойиҳалар мавжуд. Компания корхоналарнинг техник аудитини ўтказиш, лойиҳаларни амалга ошириш, қурилиш ишлари ва уларни батафсил лойиҳалаш бўйича хизматлар кўрсатади.

«KHESH Investment Partners» 2014 йили Мадрид шаҳрида ташкил этилган. Компаниянинг асосий мақсадларидан бири консалтинг хизматларини кўрсатиш, шунингдек, тиббиёт, қурилиш, архитектура, туризм каби соҳаларда етакчи испан технологиялари ҳамда Европа инвестиция фондларининг маблағларини жалб қилган ҳолда қўшма инвестицион лойиҳаларни ишлаб чиқиш ва амалга оширишда кўмаклашишдир.

2021 йилнинг 7 июнь куни Ўзбекистон Савдо-саноат палатаси ва “KHESH Investment Partners S.L.» компанияси томонидан Савдо-инвестиция соҳасида ҳамкорлик ҳамда “Ўзбекистон-Испания Савдо ва сармоя уйи”ни очиш тўғрисидаги Битим имзоланди.

Сообщение Испания ва Ўзбекистон Тошкент вилоятида агрологистик мажмуа қурилишига 55 миллион доллар сармоя киритади появились сначала на EastFruit.

11 йиллик селекция ва навларни такомиллаштириш ишларидан сўнг Испаниянинг Ibergen Frutales компанияси  яратган олхўри ва ўрикнинг Iberplum® турлараро дурагайларининг янги линияси бозорга чиқди. Янги дурагайлар маҳсулот қийматини ошириб, унинг данакли мева сегментида алоҳида ажралиб туришига хизмат қилади» дея хабар бермоқда «АгроБизнес«.

Iberplum® гуруҳи навлари олхўри ва ўрикнинг турлараро дурагайлари серияси бўлиб, пўсти ва ички қисми турли рангдаги мевалар билан бутун мавсумни эгаллайди. Селекционерларнинг мақсади истеъмолчига ёқимли таъм таассуротини тақдим этишдир, шунинг учун улар 20ºВх га яқин юқори шакар таркиби ва ажойиб тузилишга эга бўлган,  экзотик лаззатли мева олишни мақсад қилишган. IberPlum концепцияси олхўрини премиум бозорга олиб киради.

Ҳозиргача тўртта нав патентланган, қолганлари эса рўйхатдан ўтиши кутилмоқда. Ҳали маълум бўлмаган ушбу янги дастурга қарамай, Испанияда аллақачон 20 гектар IberPlum® экилган. Шунингдек, Франция, Италия, Чили ва Жанубий Африка боғбонлари билан экспериментал  шартномалар тузилган.

Компания веб-сайтида пишиб етилиш муддати 17 июндан 25 сентябргача бўлган 9 та олхўри ва ўрикнинг тижорат навлари намойиш этилди. Турли навдаги мевалар диаметри 55 дан 65 мм гача, шакар миқдори – 17ºВх дан 20ºВх гача, меванинг қаттиқлик даражаси эса 2,5 дан 3,8 кг/см² гачадир.

Сообщение Олхўри ва ўрик дурагайлари – испан селекционерларидан янги мевалар линияси (фото) появились сначала на EastFruit.

Ўзбекистоннинг Испаниядаги элчихонаси Gedepsa промоутерлик-консалтинг компанияси бош директори Алехандро Пастрана Молеро, Сурхондарё вилояти ҳокимлиги ҳамда Қишлоқ хўжалиги вазирлиги қошидаги Боғдорчилик ва иссиқхона хўжаликларини ривожлантириш агентлиги иштирокида музокаралар ташкил этди. Бу хусусда «Дунё» ахборот агентлиги мухбири хабар берди.

Видеоконференцалоқа шаклида бўлиб ўтган учрашувда томонлар Ўзбекистонда зайтун плантацияларини яратиш лойиҳасини амалга ошириш бўйича ҳамкорлик масалаларини муҳокама қилишди.

Алехандро Пастрана Молеро унинг компанияси Ўзбекистон билан зайтун плантацияларини яратиш бўйича қўшма лойиҳаларни амалга оширишда ҳамкорликни йўлга қўйишдан манфаатдор эканини маълум қилди. Унинг сўзларига кўра, Ўзбекистоннинг жанубий вилоятлари иқлими зайтун дарахтларининг айрим навлари учун қулай бўлиши мумкин. Плантациялар  Испаниянинг ҳарорат шароитлари билан бир хил бўлган ҳудудларда яхши ҳосил беради.

Испания томони вакили ўз мамлакатининг жаҳондаги энг йирик зайтун етиштирувчи эканини таъкидлади, унинг йиллик ишлаб чиқариш ҳажми 6,5 миллион тоннадан ошади. Испания компаниялари плантацияларни яратишда жуда катта тажрибага эга. Улар зайтун дарахтини ўз ватанларининг турлича иқлим шароитига эга бўлган минтақаларида ҳам, хорижда ҳам етиштиришади. Шу муносабат билан Gedepsa компанияси бош директори Испаниянинг етакчи компанияларини кўчат етиштириш, томчилатиб суғориш тизимлари, шунингдек, зайтун ҳосилини йиғиш ва қайта ишлаш ускуналарини жалб қилган ҳолда плантациялар яратиш бўйича қўшма лойиҳани амалга оширишни таклиф этди. Лойиҳа тупроқ таҳлиллари, иқлим тақвими (ҳарорат ва ёғингарчилик), баландлик ва бошқа кўрсаткичларга кўра, зайтун навларини танлаш, шунингдек, 5 йил давомида агротехник тадбирларни технологик жиҳатдан таъминлашни ўз ичига олади. Ушбу юмушга испан мутахассислари жалб қилинади, қолаверса, ўзбекистонлик агроном ва технологларнинг Испанияда амалиёт ўташи ташкил этилади.

Ўз навбатида, Сурхондарё вилояти ҳокимининг қишлоқ хўжалиги масалалари бўйича ўринбосари Усмон Туропов Испания томонига вилоятнинг Олтинсой ва Шеробод туманларида умумий майдони 1000 гектарлик зайтун плантацияларини барпо этиш билан боғлиқ режалар ҳақида маълумот берди.

Шу билан бирга, Боғдорчилик ва иссиқхона хўжаликларини ривожлантириш агентлиги директори ўринбосари Акром Адизов бу борадаги лойиҳаларни амалга ошириш борасида амалга оширилаётган ишлар ҳақида батафсил сўз юритди. Унинг қайд этишича, айни пайтда 50 гектар майдонда Испаниянинг Arbequina навли зайтун дарахти кўчатларини экиш билан бирга, зайтун плантацияларини яратиш бўйича пилот-лойиҳа бошланган. Мазкур навни Туркия компанияси етказиб берган. Лойиҳа Жаҳон банкининг кредит линияси ҳисобидан амалга оширилади ва уч йиллик техник кўмак беришни кўзда тутади. Акром Адизов зайтун плантацияларини барпо этишдан асосий мақсад, аҳолини ноанъанавий муқобил хомашёдан олинадиган ёғ билан таъминлашдан иборат эканлигини қайд этди. Зеро, республикадаги ёғ заводларини хом ашё билан таъминловчи пахта майдонлари камайиши натижасида ёғ-мой ишлаб чиқариш ҳажми камайиб бормоқда.

Испания компанияси раҳбари томонлар таклиф этган ҳамкорлик векторларидан келиб чиқиб, Сурхондарё вилояти ҳокимлиги ҳамда Боғдорчилик ва иссиқхона хўжаликларини ривожлантириш агентлиги раҳбарлари ҳамда мутахассисларидан иборат делегациянинг

Испанияга ташрифи ташкиллаштирилишини таклиф қилди. Ташриф доирасида улар зайтун етиштириш ва қайта ишлаш бўйича мамлакат тажрибасини ўрганиш учун Испаниядаги етакчи компанияларнинг плантациялари ва зайтунни қайта ишлаш заводларига боришлари мумкин бўлади.

Сообщение Испания компанияси Ўзбекистонда зайтун плантацияларини яратиш лойиҳасида иштирок этади появились сначала на EastFruit.

EastFruitнинг Ўзбекистонда голубика етиштириш учун ажойиб имкониятлар борасидаги қатор семинар, тренинг ва мақолаларидан сўнг инвесторларнинг ушбу даромадли резаворни ўстиришга қизиқиши кескин ошди.

Биринчи навбатда, йирик ўзбек компаниялари голубика кўчатларини топишда кўмак сўраб, шунингдек, Ўзбекистон иқлим шароитида уни етиштириш технологиялари ҳақида маълумот олиш учун биз билан боғлана бошлади. Хусусан, 5 дан 10 гектаргача бўлган (кенгайиши эҳтимоли бор) майдонлар ҳақида сўз борди, зеро, инвесторлар Ўзбекистонда янги экинни тажрибасиз етиштириш жуда хавфли эканини яхши тушунишади.

Хорижлик сармоядорлар ҳам мамлакатда голубика етиштиришга қизиқиш билдира бошлашди. Хусусан, «Dunyo» нашри Испаниянинг Ideal Fruits компанияси Ўзбекистонда голубика плантацияларини яратишга қизиқаётгани ҳақида хабар берди. Мазкур компания  Испания ва Марокашда голубика етиштириш тажрибасига эга, яъни, ушбу мамлакатларда иқлим Ўзбекистон билан айнан бир хил бўлмаса-да, ўхшаш.

Ўзбекистон элчихонаси вакиллари Испаниянинг Сеговия ва Астурия вилоятларида резавор етиштириб сотувчи Ideal Fruits компаниясининг голубика плантацияларига ташриф буюришди ва шу соҳада ишлаётган ўзбек тадбиркорлари билан компания раҳбарияти ўртасида видеоконференция ўтказилди, деб хабар бермоқда «Dunyo» нашри.

Музокаралар чоғида Ideal Fruits компанияси бош директори Давид Муньос Паскуаль резавор бозорининг жадал ривожи ҳақида батафсил сўз юритди. Паскуалнинг айтишича, жаҳонда, хусусан, голубикани бозорга йил бўйи етказиб беришни таъминлаш учун уни турли минтақаларда етиштиришга эҳтиёж пайдо бўлмоқда. Минтақа иқлим шароитини ҳисобга олган ҳолда Ўзбекистонда голубика ҳосили ёзнинг боши (июнь-июль)да резаворларга бўлган талабни қондира олади. Ва республикада голубика ҳосилини йиғиш жуда қулай экспорт даврида амалга оширилиши мумкин.

Шу билан бирга, EastFruit экспертларининг фикрича, Ўзбекистон иқлим шароитига кўра, голубиканинг эртаги навлари бозорга жанубий вилоятлардан анча аввалроқ етказиб берилиши мумкин. Май ойидан июлгача эса голубика ҳосилини Фарғона водийсида йиғиб олса бўлади. Шу боис, мамлакатда мазкур турдаги резаворни йиғиш ва сотиш мавсуми анча узоқ давом этиши мумкин ва бу ҳам голубика етиштириш Ўзбекистон учун фойдали бизнес эканини билдиради.

Испания компанияси раҳбарининг қайд этишича, бошқа минтақадаги резаворлар сингари бу ерда голубика етиштириш потенциали анча юқори бўлиши ва агар иш тўғри ташкил этилса, корхона ўз фойдасини тезда чиқариб олиши керак. Испания томони голубиканинг мос турини танлаб, бу ҳосилни етиштириш бўйича тўпланган тажрибани жорий этиш йўли билан амалга ошириладиган қўшма лойиҳада иштирок этиш, сўнгра бутун ҳосилни кафолатланган тарзда сотиб олишга тайёр эканини билдирди.

Ўз навбатида, «Нурли оқшом тонгги» МЧЖ вакили Жамшид Хўжаев хориж томонига Тошкент вилоятидаги голубика плантациясини яратиш бўйича пилот-лойиҳани амалга ошириш борасидаги тажриба ҳақида маълумот берди. Қайд этилишича, Ўзбекистон томони испан компанияси билан ҳамкорликни йўлга қўйишдан манфаатдор.

Музокаралар чоғида компаниянинг Тошкент, Жиззах, Қашқадарё ва Наманган вилоятларидаги бўлимларидан бирида қўшма лойиҳани амалга ошириш таклиф қилинди. Шундан сўнг томонлар маҳаллий бозорнинг ушбу маҳсулотга бўлган талабини ўрганиш, шунингдек, лойиҳа учун таклиф қилинган минтақалардаги иқлим тақвими тўғрисида маълумотлар тайёрлаш мақсадида Ўзбекистонга голубиканинг синов партиясини юборишга келишиб олишди.

EastFruit маълумотларига кўра, Ўзбекистон бозорининг ушбу резаворга бўлган эҳтиёжини ўрганиш учун голубика партияларини юборишга ҳожат йўқ. Зеро, голубика узоқ вақтдан буён Ўзбекистон супермаркетлар тармоғида фаол сотилмоқда. Бундан икки йил аввал биз голубика хариди Ўзбекистоннинг бой аҳолиси орасида урф бўлгани ва у фаровонликнинг ўзига хос рамзига айлангани ҳақида ёзган эдик. Зеро, бугунги кунда ҳатто тўй дастурхони ҳам голубика билан безатилмоқда. Шу боис, мамлакатга голубика импорти тобора ортиб боряпти, ҳатто Украина 2021 йилда уни Ўзбекистонга экспорт қила бошлади.

Шунга кўра, биз мамлакатда Испания компаниясининг голубика етиштириш бўйича инвестиция лойиҳасини амалга ошириш бўйича аниқ маълумотлар йўқ, деган хулосага келишимиз мумкин. Қолаверса, шундай тасаввур пайдо бўлмоқдаки, Ideal Fruits компанияси  Ўзбекистонда бу йўналишда бизнес яратиш имкониятларини ҳозирча жиддий ўрганмаган. Бироқ, Испания Россияга голубика етказиб бера олмаслигини ҳисобга олсак, у ерда мазкур резаворнинг нархи жаҳондаги энг юқори нархлардан бири бўлиб қолаверади. Ўзбекистонда компаниянинг плантацияларини барпо этиш эса Россиядаги голубика бозорига кириш муаммосини ҳал этишга ёрдам беради. Зеро, Ўзбекистон айни пайтда Россияга мева-сабзавотларни ҳеч бир чекловларсиз етказиб бериши мумкин.

Сообщение Ўзбекистонда голубика – катта сармоявий имконият появились сначала на EastFruit.